Supreme Court

Supreme Court-in Naupang Te’n Internet Hmang Turin Dikna Chanvo Neih Thu Sawi; Internet An Hman Khapsak Bur Thlawp Lo

19/10/2026
Admin

Supreme Court chuan India Danpui Article 21 leh Article 19(1)(a) hnuaiah hian mi tinin, naupangte pawh tiamin Internet hmang turin dikna chanvo (fundamental right) an neih thu a sawi chiang a. Court chuan internet emaw social media emaw naupangte tana hman khapsak bur chu a thlawp loh thu an sawi a ni. He thubuai hi social media platform leh link hrang hrang hmanga Child Sexual Exploitation and Abuse Material -CSEAM sem darh leh hralh a nih chungchang atanga lo chhuak a ni a. Hemi chungchang hi Court chuan September 2024 khan a lo ngaihtuah tawh a. Nimahsela, hetiang thil a thlen loh nana hmalakna neih tawh te chu an duh khawp lo a ni.Justice J.B. Pardiwala leh Justice K. Vinod Chandran te Bench chuan naupang himna leh zalenna te hi a pahniha vawnhim tur anih thu an tarlang a. An himna atana internet leh social media hman khapsak bur chu he buaina chinfelna a ni ngei a ni tih finfiahna pawh a awm loh thu an sawi. Court chuan nu leh pa zirtirna leh enpuina te, an kum a zira venhimna siam te leh social media platform-a naupangte te tana 'child mode' siam te chu a rawt a. Tin, social media-a naupangte tana thil hlauhawm leh tha lo te chu hmuh chhuah zung zung a nih theih nan national database siam te, thil thleng report leh paih bo zung zungna tur siam te, grievance officer dah te, leh he dan zawm tha duh lo platform-te tana pawisa chawi tir a hremna na zawk pek te a rawt bawk a ni. Hemi bakah hian sikul hrang hrangah digital safety zirtirna leh an kum a zira sex education pek a pawimawh thu an sawi nasa hle bawk. Central Sawrkar chu guideline hrang hrang lo ruahman tur leh an hmalak dan report te chu he thubuai ngaihtuah leh hun December 10, 2026 hmaa thehlut turin a ti bawk ni(www.jclalnunsanga.in)(He thubuai hi Just Rights for Children Alliance & Anr. v. S. Harish & Ors. (Neutral Citation: 2026 INSC 1149) a ni. Thubuai thehluttu tan Adv. Bhuwan Ribhu, AOR Saksham Maheshwari leh ukil dang te an ding a, a leh lam tan Madhulika Upadhyay AOR, Abhaid Parikh AOR, Tushar Mehta, Solicitor General leh ukil dang te an ding)

Supreme Court Chuan Delhi Metro Khuahkhirhna Chungchangah Court Zah Lohna Thubuai Thehluh Chu Ngaihtuah Chhunzawm Turin Pawm

12/10/2026
Admin

Ni 11, October 2026 (Pathian ni) khan Supreme Court chuan Delhi-a 10th October, 2026-a metro khuahkhirhna chungchanga a thutlukna siam hmasak chu zawm a ni lo tih a hmu a, court zah lohna thubuai kalpui tur a ngenna thehluh chu a pawm. Court chuan Union Home Secretary Govind Mohan, Delhi Police Commissioner Anurag Kumar leh DMRC Chairperson D. Thara te chu an insawifiahna thehlut turin a hriattir a; October 13 hmaa an insawifiahna thehlut tur leh an thupek te an zawm ngei a ni tih hriattir thehlut turin a ti bawk.He thubuai hi October 10-a New Delhi-a Jantar Mantar-a lungawi lohna lantirna aṭanga chhuak a ni a. He lungawi lohnaah hian Chief Election Commissioner Gyanesh Kumar chu bang turin an phut a. Tin, Speical Intensive Revision (SIR) hmanga vote thlak thei hming vaibelchhia 13 ai tam paih a ni chu an do a, vote thlak thei reng te’n an dikna chanvo an hloh phah a hlauhawm thu an auh chhuah pui a ni.October 9 khan Supreme Court chuan he lungawihna lantirna tura ruahman a nih avanga thuneitute’n Metro station 57 khar tura an tihna chu siam tha turin a lo ti tawh a. Hetah hian metro chetvelna chu khuahkhirh theih a nih thu an sawi a, nimahsela, metro service chu tih tawp vek tur a nih loh thu an lo sawi tawh a.Advocate Shailendra Mani Tripathi chuan thuneitute’n metro station thenkhat chu an khar zui tho avangin, court thutlukna thuneitute’n an zawm lo tiin court zah lohna thubuai chu a thehlut leh a. Thuneitute erawh chuan thil dik lo a awm loh thu sawiin, boruak awm dan venhimna atan Metro station 303 zinga 45 chauh khar a nih thu an sawi ve thung.Court chuan public transport te tha taka service tir leh a, internet tha taka hman theih tur a kal tir leh te, dan in a phal ang baka khuahkhirhna pe lo turin thu a pe a ni. He court zah lohna thubuai bakah hian, he lungawihna lantirnaa dan kalh a an dan chah te ho chungchang pawh ngaihtuah tel nghal a ni bawk. He thubuai pahnih hi naktuk October 13-a ngaihtuah leh tura dah a ni(www.jclalnunsanga.in)

Congress Hruaitute’n Mimala Hmuh An Dilna Chief Justice of India-in A Hnawl, Kalphung pangngaiin Courta Kal zawk turin ti.

12/10/2026
Admin

Chief Justice of India, Surya Kant chuan Congress hruaitute, Mallikarjun Kharge leh Rahul Gandhi-te’n inkawmna hun nei tur a hmuh an dilna chu a hnawl. October 11, 2026-a Chief Justice of India-in lehkha a thawn letnaah hian, Congress hruaitu te’n Chief Election Commissioner leh Election Commission of India chungchang, lungawi lohna lantirnaa zirlai engemaw zat man an nih chungchang leh metro station-te khar anih chungchang leh train kal dan cancel a nih chungchanga memorandum thehluh nana October 12-a inhmuh a dilna chu a chhang a. Heng thubuai kaihhnawih te hi Supreme Court-a ngaihtuah lai mek anih avangin sawiho tura inhmuh chu separation of powers leh India Danpui innghahna hrang hrang te kalh a nih tur thu a sawi a.CJI chuan India Danpui hnuaiah heng thubuaite buaipuina tur a Supreme Court-in administrative power a neih loh thu a sawi bawk. Nimahsela Court chuan mipui fundamental rights kalh a chetna chungchang thubuai chu dan ang tak a court kaltlanga endik anih theih thu a sawi a. Memorandum thehluh ai chuan dan pangngai a court-a thubuai thehlut turin a rawn a. Chutih rualin, hetiang chiah thubuai te hi October 13-ah ngaihthlak a ni dawn tih a hriattir a. October 12 zing dar 10:30 leh tlai dar 4:30 inkarah, Court e-filing system kaltlangin emaw thubuai hi a thehluh theih thu a sawi a. Dan ang tak a remchang hmasa berah thubuai chu ngaihthlak a ni ang tiin a tiam bawk a ni.Tin, vawiin ni 12, October 2026 khan Supreme Court Advocate-on-Record Association (SCAORA) te chuan Chief thutlukna hi lawmawm an tih thu an sawi a. Hetiang ang buaina te chu Court-ah dan pangngaia ngaihtuah theih reng a ni a. Political party te'n lungawi lohna an neih chuan Court-ah an thubuai te an thlen tur a ni tih Chief Justice-in a tichiang chu a lawmawm an tih thu an tarlang bawk a ni(www.jclalnunsanga.in)

Doctor Leh Hospital-a Thawktute Kutthlaktu Bail Supreme Court-in Cancel

29/09/2026
Admin

Dombivli-a Shastri Nagar Municipal Hospital-a doctor-te chunga tharum thawhna thubuai-ah Shiv Sena corporator Ramesh Mhatre hnena Bombay High Court-in bail a lo pek tawh chu Supreme Court-in a thiah sak. Justice Vikram Nath leh Justice Sandeep Mehta-te bench chuan Maharashtra sorkar ngenna ngaihtuahin September 28 khan he thupek hi an chhuah a ni. Mhatre chu ni thum chhunga a inpe turin an ti a. Doctor-te leh medical staff dangte chu an hna an thawh laiin an chunga kutthlak theih a ni lo tiin bench chuan a sawi a.Bombay High Court chuan August 7 khan Mhatre leh mi dang pathumte chu bail a lo pe tawh a. July 6 khan hospital-ah doctor-te, hmeichhe doctor telin, kut an thlak nia puh an ni a. High Court chuan trial neih tan hma chu Maharashtra pawnah an awm tur a ni a. High Court chuan thubuai ngaihtuahna chu rang taka neih zawh a ni tur a ni tiin thupek a lo siam tawh bawk. Supreme Court-ah chuan Mhatre-a ukil chuan trial neih tan a ni tawh thu leh, prosecution witness pahnih te evidence pawh lak a ni tawh tih a sawi a. Mhatre-a chuan thubuai chhuina leh trial neihnaah a thubuai chhuitute chu a thawhpui that thu a thlen bawk.Maharashtra sorkar chuan a bail hmuh chu dodalin, sorkar ukil chuan Mhatre-a thubuai neih tawhte a tarlang a. Mhatre-a ukil erawh chuan sorkar lamin a an tarlan thubuai 19 zinga thubuai 18-ah chuan thiam loh chantir a ni lo tih a sawi a Chu mi hnuah chuan Supreme Court chuan chu thubuai record-te chu a dil nghal a. Court chuan Maharashtra-a doctor-te leh hospital staff-te chunga tharum thawhna awm thin chu a ngai pawimawh hle a. Chutiang thil thleng chu law and order pangngai ang mai mai a ngaih tur a ni lo a ti a. Bombay High Court pawhin mipui thlan tlinte’n mipuite chunga tharum an thawh chuan democracy rin ngamna a tichhe thei a ni tiin a lo sawi tawh bawk a ni(www.jclalnunsanga.in)

LAFC Te’n Supreme Court-a Thubuai Pahnih-ah Induhsak Bikna Awm Theia Hriain Ngaihtuah Tha Leh Turin Thuchhuah Siam

29/09/2026
Admin

Lawyers Association for Constitution (LAFC) chuan September 23, 2026-a Justice Satish Chandra Sharma telna bench pahniin thubuai an khawih dan chu ngaihtuah that ngai nia an hmuh thu thuchhuah an siam a. Association chuan Supreme Court chu India Dan Pui humhimtu a nihna chu an zah em em rualin, he thuchhuah hi an siam niin an sawi a. An thuchhuaha thubuai tarlan pakhat chu Chief Election Commissioner and Other Election Commissioners (Appointment, Conditions of Service and Term of Office) Act, 2023 dodalna thubuai a ni a. September 23 khan, Justice Dipankar Datta leh Justice Satish Chandra Sharma bench chuan he thubuai hi Constitution Bench-in a ngaihtuah tur a nih leh nih loh ah ngaihdan inang lo an nei a, Constitution Bench ngaihtuah tir tur nge tih chungchangah Chief Justice of India, Surya Kant chu thutlukna siam turin an lo ti tawh a ni.Chutiang bawkin, Association chuan Noida District Magistrate leh Chief Election Commissioner ni lai mek fanu ni bawk Medha Roopam thubuai an ngaihtuah dan pawh an tarlang a. Chu mi ni vek chuan, Justice Sharma hova bench chuan Allahabad High Court-in Medha Roopam chungchanga thutlukna a siamte chu an stay sak a. Nimahsela, thubuai ngaihtuah dan tur (listing) chungchanga report a awm hnuah rinhlelhna siamin thutlukna chu an thlak danglam leh a ni. Hemi rual hian, Justice Sharma fapa chu Madhya Pradesh High Court-ah Election Commission of India tana standing counsel a nih thu report-ah tarlan a ni bawk.LAFC chuan heng thubuaia an thu khel leh an buaina te erawh sawi buaina an neih loh thu an sawi a. Nimahsela, hetiang thil hian mipuite mitah thlei bikna a awm nia rinna a siam thei em tih chu an ngaihtuah ber a nih thu an sawi a. Heng thubuai ngaihtuahnaah hian chhia leh tha hriatna nei leh thil awmzia man thiam tan chuan duhsak bik neihna a awm thei em tih chu ngaihtuah tur a ni, an ti a. Chuvangin, Association chuan Medha Roopam thubuai chu bench dangin an ngaihtuah tur a ni a, 2023 Act thubuai pawh Justice Sharma tel lova a thar a ngaihtuah ni se tiin an ngen a ni. Tin, thubuai ngaihtuahtu tur judge remruat danah te leh judge-in thubuai a ngaihtuah theih loh hun chungchangah te kaihhruaina chiang tak a siam turin an ti bawk(www.jclalnunsanga.in)

Naupangte Social Media Hman Dan Khuahkhirhna Siam Turin Supreme Court-in Sorkar Laipui Hriattir

29/09/2026
Admin

Vawiin ni 29, September 2026 khan Supreme Court chuan naupangte social media hman dan thunun a, digital platform-a an tawn theih thil hlauhawmte laka venhim an nih theih nan Central Sawrkar chu khuahkhirhna siam turin a hriattir. Chief Justice of India Surya Kant, Justice Joymalya Bagchi leh Justice V Mohana te bench chuan ‘Just Rights for Children Alliance’ te thubuai thehluh chu an ngaihtuah a. He thubuaiah hian naupangin social media leh digital platform dang an hman a venhimna an neih theih nan ngenna an thlen a ni.He thubuai ngaihtuahho a nih lai hian, Solicitor General Tushar Mehta chuan hei hi Digital Personal Data Protection Act (DPDP Act) hnuaia huam tel theih a nih thu a sawi a. Nimahsela, thubuai thehluttu aiawha ding Senior Advocate, HS Phoolka chuan DPDP Act chu hman a la ni lo a, 2027 aṭanga hman ṭan tura beisei a nih thu a sawi a. Solicitor General chuan naupangin social media account an hawn hmain nu leh pa phalna la phawt turin dan dang hmanga ruahmanna siam theih a nih thu a sawi bawk.Justice Joymalya Bagchi chuan kum 12 leh 15 inkar naupangte social media platform-a account siam tir an ni ṭhin chu ngaihtuahawm a tih thu a sawi a. Supreme Court chuan social media intermediary-te chuan India dan an zawm ngei tur a ni tiin, Information Technology Act leh Social Media Intermediary Rules hnuaiah Central Sawrkar chu hma la turin a ti a. Chief Justice Surya Kant chuan Sawrkar lamin hma a la tawk lo a nih chuan Court lamin hma an lak mai theih thu a sawi bawk. Solicitor General chuan Sawrkar chu hma la turin a inpeih reng tawh thu Court a hrilh a ni(www.jclalnunsanga.in) (He case hi Just Rights for Children Alliance v. Union of India and Anr., W.P.(C) No. 1120/2026 a ni).

DISCLAIMER