Supreme Court

Supreme Court-in CEC Gyanesh Kumar Suspend Tura Ngenna Leh SIR Chungchang Karlehah Ngaihtuah Dawn

29/09/2026
Admin

Supreme Court chuan karlehah Election Commission of India (ECI) thurel ṭhenkhat dodal a, Chief Election Commissioner (CEC) Gyanesh Kumar chunga hma la tura ngenna thubuai a ngaihtuah dawn. He thubuai hi Chief Justice of India Surya Kant-a kaihhruai bench hnenah thlen a ni a. Senior Advocate Vikas Singh chuan thubuai hi ECI-in thutlukna an siam dan phung nena inkaihhnawih a nih avangin rang taka ngaihtuah thuai turin a ngen a, Chief Justice chuan karlehah ngaihtuah turin a pawm. He thubuai hi India Dan Pui Article 32 hnuaiah Rakesh Kumar Singh-a thehluh a ni.Thubuai thehluttu chuan ECI hminga thutlukna siamte chu Commission pawmpui a ni em tih a zawt a. ECI chu mi tam tak awmkhawmna a nih angin, a hna thawh chu theih ang chin chinah lungrual taka thawh tur a nih thu a tarlang a. Chief Election Commissioner leh Election Commissioner dangte ngaihdan a inang lo a nih chuan, mi tam zawk duh dan hmanga chin fel tur a ni, tiin a thlen a. He thubuaiah hian electoral roll ennawn hna (Special Intensive Revision - SIR) chungchang te chu sawi lan a ni a. Tin, Election Commissioner Sukhbir Singh Sandhu leh Vivek Joshi te’n Commission hminga thurel hrang hrangah duh lohna thu an lo ziak lut ve a ni tiin a sawi bawk. October 2025 leh August 2026 inkar chhung khan chutiang duh lohna a lan chhuah tirna chu vawi 14 a tlin thu a tarlang bawk. He ngenna hi Chief Election Commissioner and Other Election Commissioners Act, 2023 Section 18 a innghat a ni. Article 324 hnuaia ECI thuneihna chu CEC chauhvin a hmang thei lo tiin ngenna a thehlut a. Thubuai thehluttu hian ECI thutlukna te chu lungruala an siam a ni nge ni lo chhui chian nan ECI record-te (minutes, file notes leh approval documents te) en fiah turin Court a ngen bawk. Hemi bakah hian thubuai ngaihtuah a nih chhung hian CEC Gyanesh Kumar chu ban rih turin a ngen a ni(www.jclalnunsanga.in)

Chini, Chi Leh Thau Tamna Ei Tur Kawrah Hexagonal Warning Label Sen Pek Rawtna FSSAI-in Siam

29/09/2026
Admin

Food Safety and Standards Authority of India (FSSAI) chuan chini , thau leh chi pai tam deuh ei tur bawm/kawr-ah hexagonal warning label sen vuah a rawt thu Supreme Court hnenah an hriattir a. Label-ah hian consumer-te’n packaged food siam dan an hriat fiah theih nan "High Sugar", "High Salt", "High Fat" leh "Highly Sweetened Beverage" tih te a ziah lan a ni ang.He rawtna hnuaiah hian, nutrients zinga pahnih leh a aia tam pai thilte chu red warning label bel sak an ni ang a. Hemi atana a tehna hi ICMR-National Institute of Nutrition, New Delhi tih chhuah "Dietary Guidelines for Indians, 2024" hman a ni ang. FSSAI chuan a kalphung hi phase hnih-a kalpui a rawt a. Phase hmasa berah chuan specified nutrient pahnih leh a aia tam pai tam thilte leh sweetened beverage thlan bikte chu warning hi bel sak an ni ang. Phase hnihnaah chuan, specified nutrient pakhat lek pawh pai tam thilte chungah pawh hman a ni ang. Single-ingredient product an tih mai - chi (salt), chini (sugar), ghee, tel (oil), gur (jaggery) leh khawizu (honey) te erawh hriatthiam an ni ang.Justice JB Pardiwala leh Justice K Vinod Chandran te bench chuan thil ei tur bawm pakhat a telh thil hrisel lo tak takin naupangte chunga an nghawng dan tur ngaihtuahin an ngaihven hle a. Court chuan thuneitute chu dan mumal tak siam turin an ti a, a tul a nih chuan thutlukna dang an siam mai tur thu a hrilh bawk a ni. He PIL hi 3S And Our Health Society te thehluh a ni a. An aiawha ding ukil chuan FSSAI rawtna thar ber chu a lungawithlak tawk chiah lo niin a sawi bawk(www.jclalnunsanga.in)

Supreme Court-in UPI Kaltlanga Rs. 2,000 Chung Lam Thil Leina Man Chawi Tur A Tih Chu Stay Duh Hrih Lo

28/09/2026
Admin

Vawiin ni 28 September, 2026 khan Supreme Court chuan Sorkar Laipuiin UPI kaltlanga Rs. 2,000 chung lam dawr thil leina man a chawi (Merchant Discount Rate - MDR) awm tura a rel chu a la stay duh rih lo. He thubuai hi October 15-a hman ṭan tur a tih, UPI kaltlanga Rs. 2,000 chung lam dawr thil leina man a chawi awm tur a dan thar siam khinletna a ni. Chief Justice of India Surya Kant, Justice Joymalya Bagchi, leh Justice V. Mohana te Bench chuan sorkarin insawifiahna kimchang a neih hma chu policy chu tihtawp rih nachhan tur awmin an hre rih lo a . Court chuan sorkar laipui chu he thil duan chhan bulpui sawifiahna affidavit thehlut turin a ti thung a ni.Sorkar chuan Court hnenah hian mimal inkara UPI hmanga pawisa inthawn chu a thlawn vek a ni ang a, dawra leina zawng zawng atanga 96% vel chu a huam ve dawn lo tih a sawi. Dan thar hnuaiah chuan, mimal leh sumdawng inkara Rs.2,000 hnuai lam thil leina chu a thlawn a la ni ang a, chu aia sang erawh chu 0.4% MDR chawi a ni tawh thung ang. Dilna thehlutute chuan he man chawina hian sumdawnna senso a ti sang thei ang a, dawr ṭhenkhatin UPI hmanga pawisa lak duh loh phah nan an hman theih thu an thlen bawk(www.jclalnunsanga.in)

Supreme Court-in CBSE Hnenah Class 6 Zirlaite chu ‘three-language policy’ Chungchangah Hriatthiamna Pe Turin Hriattir

28/09/2026
Admin

Vawiin ni 28, September 2026 khan Supreme Court chuan Central Board of Secondary Education (CBSE) hnenah Class 6 zirlaite chu Class 7, 8 leh 9 zirlaite ang tho a three-language policy-ah hriatthiamna(exemption) pe ve turin thupek a siam a. Chief Justice of India Surya Kant , Justice Joymalya Bagchi leh Justice V. Mohana te Bench chuan he thupek hi an chhuah a ni. Court hian Class-6 zirlaite hnena Sorkar Laipuiin he hriatthiamna an pek duh lo chhan chu an pawm lova. Court-in kalphung pawm lailawk a siam angin, Class 6 zirlaite chuan third language hi an zir zawm zel ang a; mahse, chu ṭawng chu Class 10 Board exam-ah an exam a ngai dawn lo va, third language avang ringawtin an pawl sawnna emaw certificate pek an nih tur pawh a dang dawn lo bawk a ni.He thubuai hi nu leh pa leh zirtirtute'n May 15, 2026-a CBSE circular chhuah dolet nan a Court-a an thehluh a ni a. He circular hian CBSE zirlai kalphung chu National Education Policy 2020 (NEP) leh National Curriculum Framework for School Education 2023 (NCF-SE) nena milin a siam rem a. Hei hian Class 6 atanga 9 zirlaite chu ṭawng pathum, India hnam ṭawng pahnih tel lovin, zir turin a phût a ni. Dilna thehluttute chuan he dan thar hi CBSE-in 2029-30 thleng a pawhsei hnuah hman thut a ni a, tin, he kalphung thar hmang tur hian ṭawng zirtirtu thiam tak tak leh lehkhabu mamawh tawk a awm lo a ni tiin an sawi bawk(www.jclalnunsanga.in)(He thubuai hi Yashica Bhandari Jain & Ors. v. Union of India & Ors. a ni)

Supreme Court-in Traffic Challan Pek Loh Ngaihven Nan Leh Pawisa Lakkhawm Dan Tur Rawtna Hrang Hrang A Siam

28/09/2026
Admin

Vawiin ni 28, September 2026 khan Supreme Court chuan traffic challan la pe lote pawisa lakkhawmna dan tur kawng hrang hrangah rawtna a siam a. Justice JB Pardiwala leh Justice KV Viswanathan te Bench chuan thuneitute chu e-challan chhuah ringawt lovin, pawisa chawi ngai te lakkhawm hna chu uar zawk turin an ti a ni. Court chuan traffic challan la pe lote chu electric bill-ah telh ni se tiin a rawt a. Pawisa hi an pek hma loh chuan vehicle registration thar pek, neitu thlak, leh duplicate registration certificate pek chhuah te chu titawp rih turin rawtna a siam bawk. Court chuan Parivahan portal-ah motor-te chu blacklist tur leh motor neitu thlakna tih tawpsak te pawh an sawiho bawk a ni.Court-ah hian State leh Union Territory-te chuan e-challan pek loh cheng nuai 45,000 vel an neih thu leh, cheng nuai 25,000 vel chu lakkhawm tawh a nih thu hriattir an ni. Court chuan motor fitness leh Pollution Under Control certificates pek chhuah loh tur te, leh challan la pe lote driving licence chungah hma lak tur te pawh a rawt belh a. Motor hmuh apiang endik thut te leh challan la pe lo an nih chuan motor lak sak mai turte pawhin an rawt bawk. Justice Pardiwala chuan thuneitute chuan hetiang thil hi a taka hman a nih theih nan kawng awmze nei tha tak an zawn a ngai a ni tiin a sawi. He rawtna hi traffic dan kenkawh dan tur electronic hmanga enkawlna chungchang thubuai ngaihtuahna atanga siam a ni(www.jclalnunsanga.in)

Supreme Court-in Ration Dawr Kaltlanga Hmeichhe Sanitary Pads Sem Darh Tura Ngenna Chungchangah State leh Union Territory Te Chu Insawifiah Tura Hriattirna Pe

25/09/2026
Admin

Supreme Court chuan ration lakna dawr kaltlanga hmeichhe sanitary pads sem tura ngenna chungchanga, an chhanna leh an thu zawm dan tarlanna affidavit thehlut lo State leh Union Territory Chief Secretary-te hnenah show cause notice a chhuah. Chief Justice Surya Kant, Justice Joymalya Bagchi, leh Justice V. Mohan te Bench chuan he thubuai hi an ngaihtuah a. Bench chuan State leh Union Territory Chief Secretary-te chu chhanna an thehluh loh avanga Rs. 25,000/- chawi tir an nih lohna chhan tur insawifiah turin a ti a ni.He thubuai hian National Food Security Act, 2013 hnuaia ration card nei te tana man tlawm zawka Jan Aushadhi sanitary pads chu ration lakna dawr kaltlanga sem tura sorkar chu thu pe turin Court a ngen a ni. Thubuai thehluttu chuan sanitary pads scheme chu kum 2018 khan tan a nih tawh thu a sawi a. He scheme avang hian sanitary pads pakhat man chu Rs.2.50/- atanga Rs. 1-ah tih tlawm a nih thu a sawi a.Nimahsela, he scheme hian thingtlang kilkhawr zawk a hmeichhe tam tak te hnenah a la thleng pha lo a. A chhan ber nia lang chu Jan Aushadhi Kendras te hi khawpui leh khawpui chhehvel ah an awm tlangpui vang a nih thu a sawi bawk. Ram pumah hian Fair Price Shops (Ration dawr) 4.78 lakh chuang a awm thu sawiin, hmeichhe tam takin an thi neih laiin puan an la hman thin thu a thlen a. He scheme hnuaia harsatna lian ber chu a mamawhtu an awm loh vang ni lovin, sanitary pads chu a mamawhtu te ban phaka a awm loh vang a nih thu a sawi bawk. He thubuai hi ni 28 September, 2026-ah ngaihtuah leh a ni ang(www.jclalnunsanga.in)(He thubuai hi Saroj Bala vs. Government of India & Ors WP(C) No. 691/2026 a ni)

DISCLAIMER