Supreme Court

Police Officer-in Ziaka Man Chhan Hrilh Lova Mi A Man Chuan A Lakah Departmental Enquiry Kalpui Ngei Tur A Ni: Supreme Court

21/09/2026
Admin

Ni 21, September 2026 khan Supreme Court chuan police officer-in ziak a man chhan hrilh lova mi a man chuan a lakah departmental enquiry kalpui ngei tur a nih thu an sawi. Justice Ujjal Bhuyan leh Justice Atul S. Chandurkar-te Bench chuan, India Dan Pui Article 22(1) hnuaiah mi man apiangte chu man an nih chhan ziaka, an tawng hriat thiam ngeia hriattir chu an fundamental right a nihzia a sawi a. Court chuan hei hi zawm a nih loh chuan man an nihna chu dan kalh a nih thu an sawi.He thubuai hi Punjab-a a thil thleng atanga intan a ni a. Jaskaranjit Singh-a chuan hmeichhe naupang kum tlinglo chungah hursualna kawngah pawikhawihna a thlen tia puh a ni a, he thubuai avang hian man a ni. District Court chuan man chhan ziaka pek a nih loh avangin man anihna chu dan kalh a ni tih a lo puang tawh a, nimahsela chu thupek chu Punjab & Haryana High Court chuan a stay a. Supreme Court a thlen hnu chuan, judge-te chuan man anihna chu India Dan Pui kalh a ni tih an nemnghet a, dan lova mi man leh man nawn leh dan tur chungchanga dan zawm tur te an sawifiah a ni.Court chuan police-in dan lova mi an man tawh hnu, man nawn leh an duh a nih chuan, chumi kawnga zawm tur venhimna dan a siam bawk. Police-te chuan dan lova mi an man, chhuah zalen tawh chu an man leh hmain, a hmaa an man chhan chu ziaka an pek hmasak phawt a ngai a, engvanga a hmaa man chhan chu pe lo nge an nih an sawifiah tur a ni a ti a. Tin, Magistrate hnen atangin phalna an la hmasa tur a ni bawk. Court chuan chhui zuina chu officer dang hnenah hlanchhawng turin a ti bawk a, dan lova mi mantu officer chu departmental enquiry hmachhawn tir tur a nih thu an sawi bawk. Departmental Enquiry-a a thiam lohna an hmuchhuak a nih chuan departmental action la in, officer service record-ah ziahlan tur a ni. He thutlukna hi State leh Union Territory tina Directors General of Police hnenah thawn a ni tawh bawk(www.jclalnunsanga.in)(He thubuai hi Jaskaran Jeet Singh vs Sate of Punjab Crl.A. No. 4234/2026, thubuai thehluttu tan Siddharth Aggarwal, Sr. Adv. Leh Yoginder Handoo, AOR leh ukil dangte an ding; a leh lam tan Gopal Sankaranarayanan, Sr. Adv. leh Ajay Marwah, AOR leh ukil dangte an ding)

Rs.2000/- Chunglam UPI Payment A Inthawna Chawi Awm Tawh Tur Dodalna Supreme Court-ah Thehluh A Ni

17/09/2026
Admin

Sumdawnnaa UPI hmanga Rs.2000/- aia sang inthawn a, pawisa chawi awm tawh tur chungchang chu Supreme Court-ah khinlet a ni a. Finance Ministry chuan ni 14 leh 15 September 2026 khan notification tichhuakin, commercial UPI transactions Rs. 2,000 chunglamah chuan pawisa chawi a awm zel tawh tur thu an sawi a. He khinletna thubuai hi Advocate Anjan Datta chuan a thehlut a ni.Thubuai thehluttu hian a tawpah chuan consumer te bawkin an tuar leh tur thu a thlen a. He pawisa chawi ngai hi sumdawngte’n indirect-in mipuite an lo chawi tir thei a, mipuite chungah indirect-in nghawng a neih a hlauhawm tiin a thlen a. He notification hi thiah a dil a ni. Thubuai thehluttu hian sorkar laipui, Reserve Bank of India (RBI), National Payments Corporation of India (NPCI) leh UPI & Services Steering Committee te lakah he thubuai hi a thehlut a ni. Sorkar chuan he dan thar hi Payment and Settlement Systems Act, 2007 zulzuiin a siam a. He dan tharah hian sumdawnna thila UPI hmanga pawisa inthawnah Merchant Discount Rate (MDR) thar a siam a. He tih lai hian mimal leh mimal inkara UPI hmanga pawisa inthawnah erawh pawisa chawi a awm loh tur thu an sawi thung. Tin, sumdawnnaa Rs.2000/- hnuai lam inthawnah pawh chawi a awm lo bawk ang a, sumdawng lian ni lo zero-MDR scheme-in a huam te pawh he pawisa chawi tur hian a huam lo bawk ang. MDR hian mimal leh sumdawng inkara (person-to-merchant (P2M)) UPI hmanga Rs.2000/- aia tam pawisa inthawn a huam ang a.Sorkar chuan bank-te leh UPI apps-te chu he charge hi mipui te chawitir lo turin a hriattir a. Tin, sawndawnna a UPI hmanga pawisa inthawn 96% vel chu he notification hian engtin mah a khawih danglam dawn lo tih an sawi bawk(www.jclalnunsanga.in)(He thubuai hi Anjan Datta v. Union of India WP(c) Diary No. 57387/2026 a ni, thubuai thehluttu tan hian Ashutosh Dubey chu a ding)

Finance Company Te'n Tihluihnain Pawisa Puk Rul Thei Lo Te Motor Chhuhsak Thei Lo; Dan Anga Hma Lak Tur A Ni

17/09/2026
Admin

Supreme Court chuan September 16, 2026 khan, pawisa puktu ten ba an rulh theih loh emaw an pek hun an pelh avangin finance company-ten motor chu pawisa puk tute hnen atanga tharum hmanga laklet an phal a ni lo tih an sawi. Justice P.S. Narasimha leh Justice Alok Aradhe bench chuan, zing dar 1 vela truck pakhat steering lock tihchhiat sak a finance company pakhatin an lak sak thubuai an ngaihtuah a. Court chuan truck neitu Hari Dutta Sharma hnenah hian rilru hahna leh a eizawnnaa channa nasa tak an thlensak avangin zangnadawmna cheng nuai khat pe turin Finance Company te chu a hriattir bawk.Sharma hian truck lei nan kum 2019 khan Cholamandalam Investment and Finance Company Limited hnen atangin loan a la a. A pawisa pek tur ang a pek theih loh hnuin, company chuan a hma pawhin truck hi an lo la tawh a, mahse a pawisa tlem a zawng a pek leh tak hnuah an pe kir leh a. April 2023 khan, CCTV atanga a landanin, a truck chu mi tu tih hriat loh pathum velin, an ruk sak a. Sharma hian chumi ni vek chuan e-FIR thehlut mah se, eng action mah lak a ni lo a. Hemi hnuah Company-te atanga legal notice hnuin, truck chu Company-te chuan la in an hralh tawh tih a hre chhuak a ni.Supreme Court chuan Allahabad High Court thutlukna chu sutin, loan puk lakletna leh motor la let leh tura hmalakna chu dan anga neih tur a ni tiin an sawi a. Company chuan motor an lak hma hian pawisa puktu hnenah insawifiahna hun pek ngai a pe lo va, hemi bakah hian loan agreement-ah pawh pawisa puktu venhimna mumal a awm lo tih Court chuan a sawi.Court chuan company hnenah chuan Sharma loan account pahnih chu khar tur te, Motor hralh ni atanga chhutin kum khata 6% pungin Rs. 4.5 lakh pe kir turin a hriattir a. Zangnadawmna atan Rs. 10 lakh leh court kalnaa sum senso atan Rs. 50,000 pe turin an ti bawk.Hetiang thubuai a thlen leh lohna tur leh bank leh finance company-ten loan rulh chungchanga RBI guidelines tha taka an zawm theih nan hma la turin RBI chu Court chuan thu a pe bawk a ni(www.jclalnunsanga.in)(He thubuai hi Hari Dutta Sharma v State of UP & Ors a ni a, thubuai thehluttu tan hian AOR Shashank Singh,Adv Gaurav Agarwal leh ukil dangte an ding a, a leh lam tan AOR Aishwarya Mishra, Adv. Anuj Chauhan leh ukil dangte an ding)

Australian Missionary Graham Staines Leh A Fapa Pahnihte Thattu Dara Singh-a Chhuah Zalen Dilna Odisha Sorkar-in Hnawl

17/09/2026
Admin

Vawiin ni 17, September 2026 khan Odisha State Sentence Board Review chuan Australian Missionary Graham Staines leh a fapa pahnihte thattu Dara Singh-an chhuah zalen (Remission)a dilna chu an hnawl thu Supreme Court ah an thlen. Odisha sorkar aiawh ukil chuan he thutlukna hi August 31 khan siam a nih chu Justice Manoj Misra leh Justice Vijay Bishnoi te chu a hriattir a. Supreme Court chuan he thubuai ngaihtuah leh hun sawn zuiin, Dara Singh-a te chu an writ petition thehluh sa chu siamtha thei turin zalenna a pe zui bawk. He tah hian chhuah zalen tura an dilna hnawl a ni hi khinglet thei turin zalenna a pe a. He thubuai hi kar thum hnua ngaihtuah leh tur a dah nghal a ni bawk.Thubuai chungchang:January 22, 1999 khan Odisha-a Manoharpur khuaah, Dara Singh-a leh mipui rual a hruaite hian Australian Missionary, Graham Staines leh a fapa Philip (kum 10) leh Timothy (kum 6)-te chu motor-a an mutthilh laiin, an awmna motor chu an hal a.Dara Singh hi kum 2003 khan trial court-in thi tura hremna a pe a. Nimahsela, High Court-ah he thutlukna hi khingletin, kum 2005-ah Orissa High Court-in dam chhunga lung in tang turin a hremna an tih hniam sak a. High Court thutlukna hi kum 2011-ah Supreme Court-in a lo nemnghet leh a ni.Dara Singh hian kum 26 chuang lung inah a tang tawh a, lung ina a tan chhung hian parole-a vawikhat mah chhuah a nih loh thu a sawi a. Tin, a thil tih chu a tleirawl lai a, India venhim a duh luat vang a nih thu a sawi a. Lung inah hian kum tam tak a tan tawh avang leh a thil tihah a inchhir avangin chhuah zalen a dil thu a sawi a ni.Supreme Court-a thubuai kalpui dan:Ni 19, August 2026 (Nilaini) khan Supreme Court chuan Orissa Sentence Review Board hnenah Dara Singh (Rabindra Kumar Pal ti a hriat bawk) chu a hun hmaa chhuah zalen a dilna chungchanga thutlukna siam turin hun hnuhnung a pe a. Hemi chungchanga thutlukna hi he thubuai ngaihtuah leh hmaa siam turin a ti a, hemi chhung a an siam lo anih chuan Supreme Court hian anmahni thutlukna an siam tawh tur thu a lo hriattir tawh a. Court chuan Odisha sawrkar chu August 19 hian thutlukna siam hman turin a lo hrilh tawh a, mahse Justice Manoj Misra leh Justice Vijay Bishnoi-te bench hnenah thutlukna engmah la siam a nih loh thu hrilh a ni a. Justice Misra chuan thutlukna mumal siam lova a awm reng mai chu an duh lo hle tih a sawi a, September 2 thleng hun pein, chumi huna thutlukna an siam lo a nih chuan Court-in a siam tawh tur thu an lo hriattir tawh bawk.Tin, ni 8th September khan Odisha sorkar tana ding ukil chu damlohna avanga a inlan theih loh avangin thubuai ngaihtuah hun chu sawn an dil a. Court chuan sorkar thuneitute chu he thutlukna siam hi an tikhawtlai reng tur a nih loh thu an sawi a. Thutlukna an siam vat loh chuan Odisha sorkar thuneitute court-a inlan tura koh an nih tur thu sawiin an vau tawh bawk. Hemi hnu hian vawiinah thubuai hi ngaihthlak leh a ni a, hetah hian Odisha sorkar thutlukna chu Court hnenah hriattir a ni ta a ni(www.jclalnunsanga.in)(He thubuai hi Rabindra Kumar Pal @ Dara Singh vs State of Odisha Diary No. 11407-2024 a ni. Dara Singh aiawh hian Adv Hari Shankar Jain leh Adv. Vishnu Shankar Jain te an ding)

Judge Te Hi Mi Thianghlim An Ni Lo; Judiciary Sawiselna Hi Thil Tul A Ni, Naupangte Zirtir Erawh Thil Dik A Ni Lo

14/09/2026
Admin

Supreme Court chuan "Judge-te hi mi thianghlim an ni lo a. Sawiselna dawng tur pawhin kan inhawng vek a. Amaherawhchu, judiciary-ah dik lo taka thil tihna a awm tia naupang te hnena i zirtir chuan, Dan Pui humhimtu ber chu ringhlel tura zirtirna i tuh a ni," tiin Chief Justice Surya Kant, Justice Joymalya Bagchi leh Justice V Mohana te ṭhutna Bench chuan kumina NCERT textbook kaihnawha thubuai ngaihven hlawh em em pakhat chu an titawp. Supreme Court chuan kumin khan Class 8 NCERT Social Science zirlaibua "Corruption in the Judiciary" tih chapter dah a nih hnuin suo motu contempt thubuai a ziak lut ta a ni.Supreme Court chuan he textbook hralh chhuah hi a khap nghal a, NCERT Director leh School Education Secretary te chu insawifiahna pe turin an ti a. Hemi hnu hian NCERT chuan ngaihdam an dil zui a, an thil tih chu tum reng vang ni lovin, tih sual palh a nih thu an thlen a. Textbook copy 82,000 chuang chu an la let bawk. Expert committee chuan National Judicial Academy puihnaain he zirlaibua judiciary chungchang chapter chu an ennawn a. Court chuan zirlai bu ziaktute chunga a thuchhuah a lo siam tawhte chu a hnukdawk leh a, judge-te chu dik taka sawiselna chu an pawm thu an sawi a, hetih rual hian naupangte chu zirtirna dik leh finfiah tawh ngei zirtirna pek tur a ni tiin a sawi bawk(www.jclalnunsanga.in)(He thubuai hi In Re: Social Science Textbook for Grade 8 (Part 2) Published by NCERT and Ancillary Issues, Suo Motu Writ Petition (Civil) No.1/2026 a ni)

JJ Act Hnuaia Kum Finfiahna Atan Baptisma Certificate Hman Theih Loh: Supreme Court

14/09/2026
Admin

Supreme Court chuan Juvenile Justice (JJ) Act Section 94 hnuaiah baptisma Certificate chu kum tlinglo pawikhawihna tuartu kum zat tihchian nan amah maia hman theih a nih loh thu an sawi. He thubuai hi Meghalaya-a tlangval pakhatin, hmeichhe pakhat a pawngsual avangin POCSO Act hnuaiah thiam loh chantir a ni a. Thubuai chhui tute chuan hmeichhe baptisma Certificate leh a nu thusawi chu a kum zat finfiah nan an hmang a, mahse JJ Act-in a phut angin sikul atanga kum finfiahna Certificate emaw Birth Certificate te chu a kum zat finfiah nan an nei lova, bone ossification test pawh an ti lo a ni. Trial court chuan pawikhawihtu hi kum 20 tang tura hremna a lo pe tawh a, he hremna hi Meghalaya High Court pawhin chu a pawmpui tawh bawk.High Court thutluknaah hian lungawi lovin, Supreme Court-ah a thubuai hi a thlen leh a. Supreme Court chuan JJ Act Section 94 hnuaiah chuan kum zat finfiah nan lehkha pawimawh hrang hrang te a ngai tih a sawi a. Baptisma Certificate chu kum zat finfiahna atana lehkha pawimawh thlan bik zingah a tel ve loh avangin, thubuai chhuitute chuan POCSO Act hnuaiah a tuartu chu kum tling lo a ni tih dan angin an nemnghet zo lo a ni.Chutih rual chuan, thubuai chhui tute chuan a tuartu hmeichhe thusawi, medical lama finfiahna leh forensic finfiahna te aṭangin hmeichhia chu pawngsual ngei a ni tih an hmu a. Hemi avang hian pawikhawihtu hi POCSO Act hnuaia thiam loh chantirna chu sutin, IPC Section 376(1) hnuaiah thiam loh a chantir ta zawk a, kum 10 tang tura hremna leh pawisa fai Rs. 10,000 chawi tirin a ti a, IPC Section 506 hnuaia thiam loh chantirna erawh Court chuan pawmpui bawk a ni(www.jclalnunsanga.in)(He thubuai hi Pynchemalangaki Bareh v. State of Meghalaya (Neutral Citation: 2026 INSC 984) a ni)

DISCLAIMER