Supreme Court

Politician Doctor Kutthlaktu Chu Taninah Dah Ngei Tur a Ni, Zalen Takin A Vak Vel Tur A Ni Lo: Supreme Court

08/09/2026
Admin

Ni 7, September 2026 khan Supreme Court chuan Shiv Sena corporator, doctor kutthlak avanga tanin a tang mek bail dilna a ngaihtuahlaiin, doctor te kutthlakna hluar zel chungchangah an ngaihdan an sawi a. He thubuai an ngaihtuah lai hian, Maharashtra-a pawikhawihna thleng dang, Maharashtra-a political party member te'n doctor kut an thlak chungchang chu an tarlang a. Supreme Court chuan doctor kutthlaktute chu tanin a khung ngei tur an nih thu a sawi a, Maharashtra sorkar chu hma la vat turin a ti bawk.Dahi Handi Festival neihnaa inhliam pakhat damdawiin atanga chhuah tir chungchanga inhnialna atangin damdawiinah hian buaina a chhuak a. Maharashtra, Palghar District-a healthcare lama thawktute leh doctor-te chu Shiv Sena party office bearers te chuan kut an thlak ni a sawi a ni a. CCTV footage atanga a lan dan chuan chung party member zing ami chuan receptionist hmeichhe pakhat, chung thil thleng lo thelh tumtu hmeichhia chu a beng a, a vau bawk a. Complaint a tarlan a nih danin, Shiv Shena District chief Kundan Sankhe, city chief Rahul Gharat leh midangte chu hospital emergency-ah an lut a, doctor-te nen chuan inhnial buaina an nei ta a ni. Tin, chung buaina lo tih tawp tumtu receptionist chu ben a nih thu tarlan a ni. Party member thenkhat chu ICU chhungah an lut bawk a ni.He thil thlengah hian Palghar Police-te chuan mi 17 chuang lakah thubuai an ziak lut tawh bawk(www.jclalnunsanga.in)

Supreme Court Chuan Pawngsual Thubuaia Tang Dhanraj-a Chu Kum 9 Hnuah Thiam Chantirin a Chhuah Zalen, Thudik Zawn Chhuah hi Court-te Tihtur Ber a Nih Thu a Sawi

08/09/2026
Admin

Supreme Court chuan hmeichhe naupang kum nga mi pawngsual a puh mipa pakhat chu thiam a chantir. Court chuan criminal trial chu prosecution leh pawi khawihtua rinhlelh(accused) te inkara inbeihna satliah a ni lo tiin ,court hna ber chu thudik zawn chhuah a nih thu a sawi.Justice Sandeep Mehta leh Justice Manmohan-te kaihhruaina bench chuan trial court leh Rajasthan High Court-te'n pawi khawih tua rinhlelh thiam loh an chantirnaah hian thil sual lian tak an tih thu a sawi a. Supreme Court chuan prosecution thu leh hlaah chuan thil fiah tawklo leh thil inperhsan tam tak a awm thu sawiin, medical evidence leh thil thleng dan chungchangah thil diklo tam tak a awm tih an hmuchhuak. Court chuan judge-te chu thuthmun atanga party te'n finfiahna an thehluh apiang an pawm mai tur a ni lo tih a sawi a . Rorelna leh thutlukna dik tak siam a nih theih nan finfiahna chu uluk taka enfiaha ngaihtuah a ngaih thu an sawi a niHe thubuai hi December 2016 atanga tan a ni a. Hmeichhe naupang hi a nu leh a unaupa nena an chhungte an tlawh laiin a bo a, a pa in police-ah complain a thehlut ta a ni. A hnuah naupang hi mi pahnihin an inah an hruai haw a, a nu leh pa te chuan a taksaah hliam a tuar tih an hmuchhuak a, naupang hian a nu leh pa bulah pawngsual a nih thu a hrilh a ni. Pawi khawihtua rinhlelh hi February 2017 khan man a ni a.Trial court chuan thiam loh chantirin, dam chhung lungin tang turin hremna a pe a. Rajasthan High Court chuan he hremna hi a pawmpui tawh bawk a ni.Supreme court chuan hmeichhe naupang pawngsuala puh Dhanraj-a chu a chhuah zalen a. Deposition neih lai hian Dhanraj-a chu court ah awm ve mah se hmeichhe naupang hian a hriat hran(identify) theih loh avangin prosecution thu leh hla chu fiah tawklo tiin , Dhanraj-a hming hi FIR ah pawh a lang lo thu an sawi a. Hmeichhe naupang hian police ten a bulah Dhanraj-a hming an puangzar thu a sawi tel bawk a ni.Pawi khawitua rinhlelh chuan an tualchhung MLA nena an intih thiamloh avangin dawta puh a nih thu court chu a hrilh a. Court chuan Investigating Officer in Dhanraj-a leh a chhungte'n politics lama inelna a awm avanga thubuai an thehluh chu a chhui chiang lo a ti a, pawngsual tuartu puihnaa pawi khawihtua rinhlelh lem siam chu a awm loh thu leh trial court hmaah thehluh a nih lo tih court hian a hmuchhuak a.Court chuan medical evidence leh prosecution in thil thlen dan chungchang an sawi danah chuan inmil lohna tam tak a hmu a. He thil thleng nia sawi a nih atanga ni hnih hnuah chauh hmeichhe naupang hi enfiah a ni a. Doctor chuan ni 5 leh ni 7 inkara thleng hliam tuarna hlui a hmu a, court chuan hei hian Prosecution thu leh hla chu a kalh tih a hmuchhuak a.Supreme Court chuan finfiahnate uluk taka a enfiah hnuin, prosecution hian Dhanraj-a chu thiam loh chantirna tur khawpa finfiahna rintlak an tarlang zo lo tih a hmu chhuak a.Court chuan thiam loh chantir a nihna chu hlipin, a chhuah zalen ta a ni. Dhanraj-a hi kum 9 aia tam zet lunginah a tang a ni.(www.jclalnunsanga.in)

Dam Chhung Lungin Tang Tura Tih Naga Hnam Hopeson Ningshen Chu Supreme Court-in A Hremna Tih Tawp Lailawk A Phalsak

08/09/2026
Admin

Supreme Court chuan sorkar thuneitute rukbo leh thah thubuaia dam chhung lungin tang tur a tih Naga hnam Hopeson Ningshen chu a hremna tih tawp lailawk phalna a pe a, bail-a tanin atanga chhuah theihna a pe. A hremna tih tawp lailawk nimahsela, Court chuan he thubuaiah hian thiam a chang ta tihna erawh a nih loh thu an sawi. A criminal appeal erawh ngaihtuah chhunzawm tur a ni ang a, thutlukna pawh la siam tur a ni ang. Lungin atanga chhuah lailawk a nih chhung hian Delhi pawn a chhuah phalsak a ni lo bawk.Hopeson-a hi Naga hel pawl, National Socialist Council-Isak Muivah of Nagaland (IM)-ah Lieutenant Colonel a ni a. Kum 2009 February thla khan Manipur-a sorkar thuneitu pathum- Dr. Thingnam Kishan Singh, Kasom Khullen Sub-Divisional Officer (SDO) Yumnam Token Singh, leh Aribam Rajen Sarma te chu rukbo an ni a, a hnuah thah zui an ni a. Kum 2014 khan Special CBI Court-in he thubuaiah hian thiam loh a chantir a, dam chhung lungin tang turin hremna a pe a ni. November 2019 khan Delhi High Court chuan thiam loh chantirna leh dam chhung tang tura a hremna chu a pawmpui bawk. Kum 2020 khan criminal appeal Supreme Court-ah a thehlut leh ta a ni.Ni 7, September 2026 khan Justice M.M. Sundresh leh Justice P.B. Varale te Bench chuan hremna tih tawp lailawk a dilna hi a ngaihtuah a. A Criminal appeal hi kum 17 chuang ngaihtuah tawh nimahsela, thutlukna tawp siam a la ni lo va. A thubuai ngaihtuah a nih chhung hian lunginah Hopeson-a hi a lo tang char char tawh tih Court chuan a hmu a. Manipur sorkar chuan he thubuai hi pawikhawihna lian tak a nih avangin a dilna hi phalsak lo turin an ti a. Nimahsela, Supreme Court chuan hun rei tak chhung tanin a a tan tawh avangin criminal appeal ngaihtuah a nih chhung hian a hremna chu tih tawp lailawk hi a phalsak a, bail phalna a pe ta ni(www.jclalnunsanga.in)(He thubuai hi Hopeson Ningshen vs Central Bureau of Investigation Criminal Appeal No(s). 455/2020 a ni. Thubuai thehluttu tan AOR Sandeep Kumar Jha, Adv Gaichangpou Gangmei leh ukil dangte an ding a, CBI tan AOR Shreekant Neelappa Terdal, ASG Vikramjeet Banerjee leh ukil dangte an ding )

ST Certificate Lem Hmanga Kum 30 Chuang Hnathawk Supreme Court-in A Pension Lak Zel Phalna Pe

07/09/2026
Admin

Supreme Court chuan Scheduled Tribe (ST) Certificate lem hmanga kum 30 chuang hnathawk a, pension hamthatna dawngtu, Shirish Pandharinath Patil chu a pension lak zel a phal sak. Justice Aravind Kumar leh Justice Vipul M. Pancholi te thutna Bench chuan a ST Certificate chu a dik loh thu puang mah se, India Danpui Article 142 hnuaia an thuneihnaah pension lak zel a phalsak a ni.Kum 1984 khan Patil-a chuan Tokre Koli Scheduled Tribe ni a insawiin, ST Certificate hi a hmu a. Tichuan, kum 1994-ah Municipal Corporation of Greater Mumbai hnuaiah Junior Engineer atan lak a ni a. Kum 1999-ah a promotion a hmu a. A ST original certificate a tih bo hnuin , kum 2000 khan ST certificate thar a dil leh a. Kum 2008 khan an hotupa chuan a ST Certificate chu verification nei turin a thawn a, Vigilance Cell chuan an thlahtute record a en hnu chuan Tokre Koli ni lovin “Hindu Koli”, leh “Hindu Suryawanshi Koli”, an nih thu an hmu a. Scrutiny Committee chuan a certificate chu kum 2020 khan an cancel a. Bombay High Court chuan Scrutiny Committee thutlukna hi a lo pawmpui tawh bawk a ni.Supreme Court chuan Patil-a ST certificate chu a dik loh thu an nemnghet a. Nimahsela, he thilthleng hi chu thil danglam bik a ni a, kum 30 chuang a retire hma thlengin he hna hi a lo thawk tawh a, a chhungte chuan pension hamthatna ni lo thil dang engmah an dil tel loh thu tarlan a ni a. Rorelna dik tak a awm theih nan Court chuan a pension chu lak zel a phalsak a; hetih lai hian, an thlah te lo kal zel tur erawh ST reservation hamthatna an neih chhunzawm erawh a phalsak lo thung(www.jclalnunsanga.in).

NEET Zawhna Putru Lungawilohna Lantirnaa Tel Zirlaite Laka FIR Ziah Luh Zawng Zawng Supreme Court-in A Thiat

02/09/2026
Admin

Ni 1, September 2026 khan Supreme Court chuan NEET zawhna put ru kaihhnawiha, July 20-25 inkara ramchhung hmun hrang hrang a lungawilohna lan tirnaa kal zirlaite laka FIR ziah luh zawng zawng chu a thiah sak a, chhuizui a, bawhzui tawh lo turin hriattirna a pe nghal a ni. Hei hi zirlai te hmakhua tur an ngaihtuah vang niin an sawi.Chief Justice Surya Kant, Justice Joymalya Bagchi leh Justice V Mohana te chuan he thubuai hi an ngaihtuah a. Solicitor General Tushar Mehta chuan NEET UG-2026 exam cancel vanga zirlai nunna chan ta te chu sorkar-in zangnadawmna a pek tur thu Court hnenah hian a hrilh a. Nimahsela, thil tul ang buaipuina atan thla thum (3) hun an mamawh tur thu a sawi a. Court chuan a dil angin thla (3) hun a pe bawk.Tin, Court-in FIR zawng zawng a thiah tak avangin leh, zangnadawmna pawh sorkar-in a ngaihtuah tur thu an sawi avangin, Coakroach Janata Party aiawha inlan Saurav Das chuan 5th September-a protest neih leh tura an ruahman chu cancel a nih thu Court-ah hian a sawi nghal bawk(www.jclalnunsanga.in)(He thubuai hi Yashovardhan Azan and Others v. Union of India and Others (and connected cases) a ni)

"Doctor Kutthlaktu Chu Bail Hmu Tlak A Ni Lo”: Supreme Court

02/09/2026
Admin

Ni 1, September 2026 khan Supreme Court chuan Shiv Sena corporator, Ramesh Sukrya Mhatre-a thubuai a ngaihtuahlaiin damdawi in chhunga doctor-te kutthlak hi pawikhawihna lian tak a ni a, ngaihthah mai theih a ni lo tih a sawi. Doctor-te kutthlaktu chu bail hmuh tir tlak an ni lo tiin a sawi bawk.July 6 khan Kalyan-Dombivli Municipal Corporation enkawl Shastrinagar Hospital-a hmeichhe nau thei mai tawh chu rei tak hospital-ah nghah tir a ni a. Hemi hnu hian hmeichhe chhungte hian Corporator hi an call a, damdawiin a thlen hnu hian hmeichhe naupai enkawlna chungchangah inhnial buaina a chhuak ta a ni. Mhatre hian inhnialna an neih hnuah doctor pathum te chu kut a thlak ta a ni.July 7 khan FIR ziahluh a ni a, July 14-ah Magistrate chuan bail phalna pe mah se, Bombay High Court chuan suo motu cognizance a la a, bail chu stay rihin, amah leh amah police-te kuta rawn inpe leh turin a ti ta a ni.Justice Vikram Nath, Justice Sandeep Mehta leh Justice Augustine George Masih te Bench chuan High Court-in he thila a inrawlh hi thil dik tak a nih thu a sawi a, medical professional-te zahawmna leh himna vawnhimna turin Court inrawlh hi thil dik a ni tiin a sawi a. Bombay High Court-in a bail an stay tawhna chu a pawmpui thu a sawi. Court chuan Mhatre-a ngenna hi Maharashtra sorkarin a hnu a bail order a khinna nen ngaihtuah ho turin a ti a, thawhtanniah he thubuai hi ngaihtuah chhunzawm turin a dah a ni(www.jclalnunsanga.in)(He thubuai hi Ramesh Sukrya Mhatre v. High Court of Judicature at Bombay SLP(Crl) No. 16040-16041/2026 a ni)

DISCLAIMER