Supreme Court

Vawiinah Supreme Court AoR Exam Result Chhuak, Advocate 207 An Pass.

26/02/2026
Admin

Nikum June thla-a Supreme Court a, Advocate on Record (AoR) exam chu vawiin khan Result tih chhuah a ni a. Mi 207 ten hlawhtlinna an chang. Mi 2000/2500 bawr velin AoR exam hi an ziak tlangpui thin. Tun tum exam-a Topper hi Advocate Bebaprito Bhattacharya a ni a, Dr Mithilesh Jha, District Judge-I chawl ta kum 60 pel tawh pawh a in ziak tling. AoR exam a Coaching/Training pe thin LawSikho in a tarlan danin kum 2025 a dan hremi 20,00,000 zingah AoR hi 0.002 % an awm mek. Tute nge AoR chuSupreme Court ah hian AOR kaltlang lovin eng case mah putluh leh sawi theih a ni lo a. Supreme Court Rule 2013-a Order IV-a Rule 1(b)-a tarlan angin Advocate-on-Record lo tan chuan court hmaa thusawi (argue) a theih lo a, argue ve tur hian Court emaw Advocate-on-Record phalna lak phawt a ngai a, Senior Advocate pawh AoR tello chuan case file leh din a theih loh a ni. AoR ziak thei tute nge?Ukil kum 4 practice tawh hnuah Supreme Court a Senior AoR(Kum 10 AoR ni tawh) hnuaia kum 1 traning tawh ten AoR exam hi an ziak thei a. Training bul tan leh zawh tawhah Supreme Court Registrar a hriattir leh pawmpui a ngaih avangin Delhi a chenchilh an ni tlangpui. Heng subject pali- Supreme Court Practice kalphung, Drafting, Professional Ethic leh Landmark case tea tang hian 60 % hmuh vek ngai a ni. Subject pakhat-a 50 marks aia tlem hmuh chuan a pass theih loh a, mi pakhatin tum 5 exam hi a pe thei. 15-20 % hi AoR exam pass rate a ni tlangpui a, tunlai technology hmasawnna avangin pass rate pawh a tha chho deuh deuh.Hmarchhak State tan kan ngaiIndia hmarchhak state-ah Manipur leh Assam state hian AoR tlemte an nei mek a. Nagaland hian Rtd Justice HK Sema, India hmarchhaka ST zinga Supreme Court a judge kan neih awm chhun fanu Enatoli K Sema an nei mek a. Pu JC Lalnunsanga chuan kum 2022 AoR exam khan a pass. Sikkim, Arunachal, Meghalaya leh Tripura state atang hian AoR hi an la nei hrih lo.Mizo te zingah AoR exam ziak ve duh an awm chuan hemi website neitu hian engtih lai pawhin puih a in huam reng.

Supreme Court-in NCERT Class-8 Zirlaibua Judiciary Sawichhiatna Chungchangah Hmalakna A Kalpui

26/02/2026
Admin

Supreme Court of India chuan NCERT-in Class 8 Social Science zirlai lehkhabua “judiciary-a corruption” tih chapter a dah avangin thupek khauh tak a siam. Court chuan School Education Secretary leh NCERT Director te insawifiah turin a ti a, court chuan an chungah court thu zawmlo/zahloh avanga hremna lekkawh anih loh nachhan tur sawi turin a koh a ni. Chief Justice Surya Kant kaihhruai court chuan, he thil thleng hi tum reng vang a judiciary tih hmingchhiat tumna a nih chuan criminal contempt a ni thei a ni a ti a, Court chuan NCERT in thupha a chawina chu uluk taka ngaihtuah a, tihpalh thil a ni tak tak em tih ngaihtuah a ngai a ni a ti.Court chuan he lehkhabu hi khap burna thupek a chhuah a, lehkhabu awm zawng zawng chu hrenbeh (seize) tur leh online-a awm zawng zawng pawh paih turin a ti a ni. Court chuan he lehkhabu hi eng school mah in an zirtir tur a ni lo a ti a. NCERT Director chu he chapter siamtu te hming leh an chanchin te pe tur leh meeting-a an relna record-te pawh rawn thlen turin a hrilh.He thu Court in a ngaihtuah lai hian Solicitor General Tushar Mehta chuan he thu ziahna chapter hi paih ani tawh a, lehkhabu print tawh zingah pawh copy 32 chiah hralh chhuah hman a ni a ti. Mahse Chief Justice chuan NCERT thuchhuahah ngaihdamna dilna chiang tak a awm lo a ti a bawk. Court chuan CJI hlui BR Gavai thu sawi te pawh dik lo taka hman an ni a ti. Court chuan, judiciary sawiselna leh thil dik leh felhlel awm te au chhuahpui chu phal ni mahse judiciary tih hmingchhiat tumna chu a enliam mai mai dawn lo a ti a ni. He case hi ngaihtuah chhunzawm zel tur a tih ani.(He thubuai hi In Re : Social Science Textbook for Grade-8(Part 2) published by NCERT and ancillary issues, SMW (C) 1/2026 a ni)

Hnuchhuinaa Rinhlelhin Police-te A Phone A Pek Loh Avangin Bail Dilna Hnawlsak Tur A Ni Lo: Supreme Court

25/02/2026
Admin

Ni 16, February 2026 (Thawhtanni) khan Supreme Court chuan pawi khawihtua rinhlelhin, thubuai chhuinah police-te a thawhpui tha tur a ni tih hian, India danpuiin pawikhawihtua rinhlelhte dikna chanvo a pek, mahni leh mahni insawi awk thei zawnga thil tih loh theihna dikna chanvo hi a palzut theih loh thu an sawi. He thubuai hi NDPS Act hnuaia khuh damdawi bur 710 an man tak atanga lo chhuak a ni a. He thubuaia rihlelh hi High Court-in anticipatory bail a hnawl sak a, Supreme Court-ah hian a zualko ta a ni.December 15, 2025 khan Supreme Court chuan he thubuaia rinhlelh hi thubuai chhuinaa a tel phawt chuan man lo turin ‘interim protection’ a lo pe tawh a. February 2, 2026-ah chuan pawikhawihtua rinhlelh hi police hmaah inlanin, thubuai chhuinaah hian tel mahsela, sorkar lam chuan a mobile phone police-te hnena thubuai chhuina atana a pek duh loh thu an sawi a, bail pek hi an dodal ta a ni. Sorkar chuan thubuai chhuina kawngah a thawhpui tha lo angah an ngai a, bail hi pe lo turin an ngen a, mahse Justice Sanjay Kumar leh Justice K. Vinod Chandran-te chuan thubuaia rinhlelh hi thubuai chhuinaah a tel tawh a, lung ina dah luh khera thubuai chhuina kalpui a ngaih loh thu an sawi a ni.Court chuan dan anga thubuai chhuina kalpui chu sorkar mawhphurhna a nih rualin, mi tupawh an mobile phone-a thil awm hmanga anmahni insawi awk thei thil pe turin an nawr luih theih loh thu a tarlang a. Right against self-incrimination (mahni leh mahni insawi awk thei thil sawi loh theihna dikna chanvo) hi Constitution-in mi tin tana a ruat, palzut thiang lo a ni tih an sawi bawk. Chuvangin, Supreme Court chuan anticipatory bail hi a pe ta a ni(www.jclalnunsanga.in)(He thubuai Vijay Kumar Gupta vs. State of Madhya Pradesh ah hian thubuai thehluttu tan AOR Tushar Giri, Adv. Sahil Balaik leh ukil dangte an ding a, sorkar tan AAG DS Parmar, AOR Mrinal Gopal Elker leh ukil dangte an ding)

Bawlhhlawh Enkawl Dan Thar Solid Waste Management (SWM), 2026 Leh Supreme Court Hriattirnate

25/02/2026
Admin

Ni 19, February 2026(Ningani) khan Supreme Court chuan Solid Waste Management (SWM) Rules, 2026 kengkawh turin kaihhruaina pawimawh tak a siam a, hei hi April 1, 2026 atanga hman tan tura tih a ni. Court chuan thil thar kan hman hnua kan paih leh nghal mai thin te, kan hnam/ram hmun hluite kan enkawl that loh avanga bawlhhlawh paihna hmun a ni ta mai thin te hi pawi a tih thu an sawi a. India ramah hian Article 21 hnuaiah boruak leh hmun hma thianghlim neih chu mi tin dikna chanvo a ni a. Justice Bhatti leh Justice Mithal-te chuan ni tina kan bawlhhlawh paih tam tak zinga a zat ve zet chu enkawl lohin khawlaiah emaw, rethei zawkte chenna hmun bulah emaw paih a ni thin chu pawi an tih thu an sawi a. Hei vang hian, bawlhhlawh paih tawh hnu buaipui dan dik a buaipui loh chu thil sual anga ngaih a ni tawh dawn a, thuneitu hna thawk tha lote chu an hlawh hren sak thlengin hremna pek an ni thei dawn a ni.He thuchhuaha pawimawh ber te zing ami chu bawlhhlawh chi li a thliar hran hi a ni: a huh (wet), a ro (dry), Hriselna thil (sanitary), leh bawlhhlawh buaipui uluk bik (special care) entirnan: syringe hman hnu, hliam tuamna bandage etc te an ni. Khawpui Mayors leh Ward Councillors te chu endiknaa hma hruaitu an ni ang a, mi tinin bawlhhlawh an thliar hran theih nana zirtirna pe turin mawhphurhna an nei a ni. District Collector-te chuan bawlhhlawh enkawlna hmunhmate an enfiah reng tur a ni a, thlalak hmangin hna an thawh dan chu online-ah an thawn thin tur a ni. In lian leh dawr hmunpuite chuan March 31, 2026 hma ngei hian bawlhhlawh enkawlna khawl an nei tur a ni a, an neih loh chuan hremna lian tak an tawk ang.SWM, 2026 kaihhruaina dan zawmlote chu remna pek dan theih an ni a, hetiang hian level thumah then a ni a: Level 1-ah chuan bawlhhlawh thliar hrang lo apiang hremna pawisa chawitir nghal an ni ang; Level 2-ah chuan thu zawm duh lote chu court-ah thubuai siam sak an ni ang; Level 3-ah chuan thuneitu, an mawhphurhna hlen lo leh bawlhhlawh thliar hrang lova paih mai maitute chu hrem an ni ang.Kan mawhphurhna theuhte tha taka kan hlen theuh theih nan khawpui lian deuhte chu an hna thawh dan azirin ‘ranking’ siam sak an ni ang a, chu chu mipui hmuh theihah tarlan a ni ang. Zirna inah pawh naupangte’n faina an ngaihpawimawh theih nan zirlai buah bawlhhlawh enkawl dan hi telh a ni tawh dawn bawk. March 15, 2026 hma ngei hian he hna thawk tur bik "task force" din vek tur a ni a, March 25-ah Court-ah report pek leh tur a ni ang. Industry lian te pawh bawlhhlawh atanga siam fuel (RDF) hmang turin hriattir an ni bawk(www.jclalnunsanga.in)(He thubuai Bhopal Municipal Corporation vs. Dr. Subhash C Pandey ah hian thubuai thlentute tan Vanshaja Shukla, AOR, Adv. Gunjan Chowksey, Adv. Ankeeta Appanna leh ukil dangte an ding a, a leh lam tan Arpit Gupta, AOR, Adv. Akansha Agarwal, Adv. Divya Pratap Parmar leh ukil dangte an ding)

India Ram Hmun Hrang Hranga Bar Association-te Kalphung Siamthatna Turin Supreme Court-in Hmalakna Kalpui Mek

23/02/2026
Admin

India Ram Hmun Hrang Hranga Bar Association-te Kalphung Siamthatna Turin Supreme Court-in Hmalakna Kalpui MekNi 11, February 2026 khan Supreme Court chuan, Bar Associations kalphung siamthat leh tihchak chungchanga suo motu (thubuai thlentu awm lova Court-in a thuneihna hmanga thubuai a ngaihtuah) thubuaiah, Bar Council leh Associations-a a fawng vuantute chu kar li chhunga an thu ngaihtuah duhte thlen turin hun a siam sak. Division Bench, Justice Dipankar Datta leh Justice Satish Chandra Sharma te chuan thubuai hi an ngaihtuah.Buaina lo chhuahnaNi 16, July 2024 khan Supreme Court chuan Madras Bar Association member chungchanga intihbuainaa, thubuai pakhat chu huap zau zawkin a thuneihna hmangin hma a la a. Chu thubuai chu “Re: Strengthening and Enhancing the Institutional Strength of Bar Associations.” ti a thlak danglam a ni a. He thubuai lo chhuahna hi Elephant G. Rajendran leh A. Mohandoss te thubuai thehluh atanga lo awm chho niin, Supreme Court chuan India ram hmun hrang hranga Bar Associations te thuneihna leh rorel dan endikna turin, ama thuin (suo motu) he thubuai ngaihtuah tur huam chin a tizau ta a ni.Bar Association kangkaiJuly 2024 order-ah chuan, Court chuan thuneihna neitu lian zualte leh an aiawhte chu respondents a dah vek turin a ti a. Bar Council of India, Supreme Court Bar Association (SCBA), Supreme Court Advocates-on-Record Association (SCAORA), State Bar Councils-te aiawh Chairpersons, High Court Bar Associations aiawh tur theuh Ukil te chu respondents atana dah an ni a. Court chuan High Court pakhata, Bar Association pakhat aia tam a awm chuan, hriattirna chu Registrars General te’n an President hnenah pe theuh turin a ti bawk.February 11, 2026 HearingFebruary 11, 2026 khan Division Bench Justice Dipankar Datta leh Justice Satish Chandra Sharma chuan he thubuai hi an ngaithla a. Court chuan he thubuai hi, July 2024 atangin ngaihtuah ni tawh mah se la, thutlukna mumal tak siam ala nih loh thu a sawi a. Senior Advocate K. Parameshwar, Amicus Curiae, leh Advocate Vipin Nair, Nodal Counsel, leh Bar Association leh Council hrang hrangte aiawh chuan Court-ah thu thehluhna hun an nei a.Court chuan ukil pawl hruaitute chu kar li chhunga thu ngaihtuah tura an remtih tlante chu thehlut turin a hriattir a. Court chuan Adv. Nair chu High Court hrang hranga Registrar General-te hnenah thawn turin an ti a. An ni chuan an thuneihna hnuaia District leh Sub-Divisional Bar Associations te hnenah an thawn chhawng ve leh ang. Heng ukil associations-te hian thubuai ngaihtuah tura an duhte chu Court-in email address a ruat bikah an thawn thei a ni.He thubuai hi kar riat hnua ngaihtuah leh tura dah a ni a. Court hian thubuai ngaihtuah tura lo lutte chu a ngaihtuah anga, hmalakna neih dan tur a chhawp chhuak ang. He hmalakna hi Supreme Court-in India ram hmun hrang hranga Bar Associations te kalphung, thuneihna, langtlangna, member nihna dan leh inrelbawlna siamthatna tura hmalakna a kalpui mek lo enpuina a ni(www.jclalnunsanga.in).(He thubuai In Re: Strengthening and Enhancing the Institutional Strength of Bar Associations v. The Registrar General & Ors. ah hian Amicus Curiae Sr. Adv. K Parmeshwar a ding a, thubuai thehluttu lam tan AOR Dr. Sunil Kumar Agarwal, Adv. Amarjeet Sahani leh ukil dangte an ding, a leh lam tan Sr. Adv. Anand Sanjay M. Nuli, Adv. Akhila Wali leh ukil dangte an ding)

Intihlum Dun Tura Inthurualnaa Dam Khawchhuak Zawk Chu Intihhlumna Thlen Tirtu Anga Hrem Theih A Ni: Supreme Court

19/02/2026
Admin

Intihlum Dun Tura Inthurualnaa Dam Khawchhuak Zawk Chu Intihhlumna Thlen Tirtu Anga Hrem Theih A Ni: Supreme CourtNi 17, February 2026 (Thawhlehni) khan Supreme Court chuan, intihlum dun tura intiamkamna siam a nih a, inthurualna neitute zinga dam khawchhuak an awm chuan, a dam khawchhuak chu section 306 & 307 IPC hnuaiah thihna thlentirtu anga thiamloh chantir theih a ni, tiin an sawi. Justice Rajesh Bindal leh Justice Manmohan te bench chuan kum 2022-a actress Prathyusha thihna chungchanga a bialpa, Gudipalli Siddhartha Reddy thiamloh chantirna chu a pawmpui a. Court chuan mi pahnihin thi dun tura an inthurual chuan, an pahnih remtihna chuan intihlum turin rilru lama damna leh fuihna a pe a. An pahnih zinga pakhat an dam khawchhuah chuan, an thiltiha tel vena chuan mawhphurtu a nih tir theih thu an sawi.He thubuaia intihhlum tum mi pahnih te chuan inneih an tum a, nimahsela, an chhungte chuan an remtihpui lova. Dodalna an tawh avang chuan intihlum turin an inthurual ta a, organophosphate pesticide an ei a. A hmeichhia zawk Prathyusha chu a thi a, a mipa zawk Reddy chu a dam khawchhuak thung a. Reddy chu intihhlumnaa mawhphurtu anga thiamloh chantir a ni a, kum 5 chhung lungin tang tura tih a ni. A hnuah Andhra Pradesh High Court chuan kum 2 chhung tang turin a tihhniam sak a. Supreme Court-ah thiamloh an chantirna hi hnial kalhna an thlen ta a ni. Supreme Court chuan mawhphurhna chu mahni ngeia tur(poison) pekah chauh ni lovin, rilru lama thlawpna leh fuihna ringawt pawh a huam a ni. Intihlum tura inthurualna hian an duhthlannaah a pui a, inthurual lo se la chuan anmahni chauh chuan he thutlukna hi an siam lo thei a ni, tiin an sawi.Court chuan pawngsual anga puhna leh Prathyusha nuin a rek anga puhna erawh a hnawl thung a. Medical, forensic evidence, AIIMS leh mi thiambik te report chuan a thih chhan chu poison (tur) vang tiin an thlawp vek a. Evidence(finfiahna) atanga a landanin, pawikhawihtua puh hian tur(poison) chu a lei a, amah nena hmuh hnuhnun ber an ni bawk. Court chuan intihlum tura inthurualna hian a thiamlohna a tih kiam loh thu an sawi a, dan chuan nunna venhim a tum tlat thu an sawi a. Pawikhawihtu chu kar li chhunga lo inpe turin a hriattir bawk(www.jclalnunsanga.in)(He thubuai Guddipalli Siddhartha Reddy vs. State CBI ah hian thubuai thehluttu tan Sr. Adv. S Nagamuthu, Adv. P Venkat Reddy, AOR G. N. Reddy leh ukil dangte an ding a, CBI tan Sr. Adv. Nachiketa Joshi, AOR Mukesh Kumar Maroria leh ukil dangte an ding)

DISCLAIMER