Supreme Court

Police Custody-a Awm Hmaa Thusawi Chu S. 27 Indian Evidence Act Hnuaiah Pawm Theih A Ni Lo: Supreme Court

19/02/2026
Admin

Police Custody-a Awm Hmaa Thusawi Chu S. 27 Indian Evidence Act Hnuaiah Pawm Theih A Ni Lo: Supreme CourtNi 17 February, 2026 (Thawhlehni) khan Supreme Court chuan pawi khawihtua rinhlelhin, police custody-a a awm hmaa, thil thlen dan a sawi atanga thil hmuhchhuah(discovery statement) an neih chu, S.27 Indian Evidence Act,1872(IEA,1872) hnuaiah pawm theih a a nih loh thu an sawi. Justice Sanjay Kumar leh Justice K. Vinod Chandran-te bench chuan mi pakhat, a fa hrawn kum 6 mi thattu anga an puhnaah a chhuah zalen. Police hnena a thusawi bawhzuiin, ruhro leh thildangte hmuhchhuah nimahsela, dan ang takin darkar eng nge maw zah hnuah chiah man a ni a.Thil thlen dan a sawi lai hian police custody-ah a awm lova, S.27 hnuaia kalphung zawm tur; police custody-a awm laia, thil thlen dan a sawi atanga thil hmuchhuah chu, case nena inzawmna a neih dan a zirin, pawm theih a ni ang, tih chu zawm famkim a nih loh thu bench chuan an sawi. Court chuan Section 27 IEA,1872 chu dan zawm tur pangngai (general rule): police hmaa inpuanna neih chu pawm theih a ni lo, tih atanga hriatthiamna (exceptions) a nih thu an sawi a. Thil thleng hrang hrangte chu accused-in police custody-a a awm laia a pek a nih chiahin, hemi hnuaiah hian pawm theih a ni. Custody tih hian dan ang taka man (arrest) a ni kher lova, mahse police thuneihna hnuaiah leh khuahkhirhna hnuaia a awm ngei a ni tih finfiahna tha tak a awm a ngai a ni. He case-ah hi chuan, accused-in statement a pekin, chutianga police thuneihna leh khuahkhirhna hnuaiah a awm ngei a ni tih finfiahna a awm lova. Chuvang chuan S.27 hnuaia an thil hmuhchhuah chu innghahna atan hman theih a ni lo, niin Court chuan a sawi. Nimahsela, Court chuan a thusawi atanga police-in case kaihhnawih thil an hmuhchhuah theihna chu S. 8 Indian Evidence Act hnuaia “conduct” (pawikhawihna thlen hma leh thlen hnua thiltih) a nih theih thu an sawi a. Hetiang pawh hi lo ni se, finfiahna chu a tha tawk lo a, finfiahna tha tak dangte puitu atan chauh a hman theih thu an sawi a, thiamloh chantirn turin a chak tawk lo a ni. Finfiahna dang an neih te pawh a that tawk loh avangin, Court chuan accused hnenah chuan pawi a khawih ngei a ni tih chianna tak tak a awm loh avanga hamthatna(benefit of doubt) a pe a, chhuah zalen turin thupek a chhuah ta a ni. He thutlukna hian a tih chian chu S. 27 hnuaiah chuan custody a awm ngei ngei a ngai tih hi a ni(www.jclalnunsanga)(He thubuai Rohit Jangde vs The State of Chhattisgarh ah hian thubuai thehluttu tan Sr. Adv. Rajesh Pandey, AOR Chandrika Prasad Mishra leh ukil dangte an ding a, sorkar tan AOR Ankit Sharma, Adv. Arjun D. Singh leh ukil dangte an ding)

Supreme Court Chuan Civil Judge Exam Turte Tan Kum 3 Practice A Ngai Ti A Thutlukna An Siam Tawh Chu Open Court-a Ngaihtuah Leh A Remti

19/02/2026
Admin

Supreme Court Chuan Civil Judge Exam Turte Tan Kum 3 Practice A Ngai Ti A Thutlukna An Siam Tawh Chu Open Court-a Ngaihtuah Leh A RemtiSupreme Court of India chuan Civil Judge (Junior Division) post-a luh theihna atana, kum 3 law practice neih a ngai tia a lo sawi tawh chungchangah review petition thehluh niin, open court-ah ngaihtuah a remti a. A tlangpuiin review petition-te chu chamber-ah, oral argument nei lova ngaihtuah thin a ni a. Mahse tun tumah erawh chuan Court chuan ukil te chu open court-a an hnialkhanna neih te sawi a phal sak a ni. He thubuai hi February 26-ah ngaihtuah a ni ang.May 2025 khan Supreme Court chuan Civil Judge exam pe turte chu kum 3 tal law practice ngei ngei turin rules a lo siam tawh a. He dan erawh hi chu thupek chhuah hnua exam tur te atanga hman tur a ni a, nimahsela, notification lo chhuak tawh te leh exam kalpui mek te chu a nghawng buai lo thung. High Court-te leh State sorkar-te chu an service rules siamthaa, he dan thar hi belh turin an lo ti tawh bawk a ni.Review petition-ah hian he dan siam thar hi dodal a ni a. Petitioners-te chuan Law Commission report hmasa te chuan compulsory practice rules hi an pawm lo tih an sawi a. He rules hian Constitution-a Articles 14 leh 16 (intluktlanna leh hnathawh tur pek kawnga rualkhaina) a kalh thei a ni an ti. Law graduate tharte, mi rethei zawk leh harsa zawkte chungah nghawng nasa tak a nei thei a ni tih an sawi a. Court chuan heng thilte hi a zir chiang dawn a ni(www.jclalnunsanga.in)Dan lam kaihhnawih thutharte hi Whatsapp Group siamin update kan post thin a. Hemi Groupa i awm ve duh a nih chuan hemi link-ah hian lo join ve turin kan sawm a che. https://chat.whatsapp.com/BEZzj5EzMLCBEQjtWYRFug?mode=gi_c https://chat.whatsapp.com/DMaRfCsAQimCo6fLFyYNuS?mode=gi_c

Tribal Christian Ruang An Phumna Atanga Tih Luihnaa An Laih Chhuah Sak Thin Chu Ti Tawh Hrih Lo Turin Supreme Court-in Thu A Pe

18/02/2026
Admin

Tribal Christian Ruang An Phumna Atanga Tih Luihnaa An Laih Chhuah Sak Thin Chu Ti Tawh Hrih Lo Turin Supreme Court-in Thu A PeVawiin ni 18, February 2026(Nilaini) khan Supreme Court chuan Chattisgarh-a tribal Christian-te ruang phum tawh hnu tih luihnaa laih chhuah sak thin chu ti tawh lo turin interim order a chhuah. Justice Vikram Nath, Justice Sandeep Mehta leh Justice N. V. Anjaria te chuan order thar pek a nih leh hma chu “ruang phum tawh laichhuah leh chu remtih a ni tawh lo” tiin an sawi a. Thubuai thehluhah hian police leh khawtlang thuneitute chuan tih luihnaa, tribal Christian-te ruang phum tawh hnu chu an laih chhuahsak thin thu an sawi a, hmun hla tak tak a sawn sak an nih thin thu an tarlang a ni.Thubuai thehluttute tana ding, Senior Advocate Colin Gonsalves chuan Tribal Christian chhungkaw 143 chuang te chu an khaw chhunga thlanmualah inphum phal sak an nih loh thu a thlen a. Heng zingah hian Bastar, Kanker, leh Dantewada district a mi te an tam ber a, heng khuaah te hian hun rei tak chhung an cheng tawh hlawm a. An ruang phum tawh te chu a chang phei chuan an chhungte hriat lohin an laih chhuah sak a, 50-76 km laia hlaah te an phum sak leh thin a ni.He thubuaiah hian Supreme Court thutlukna hmasa Ramesh Bhaghel v. State of Chhattisgarh chu thuneitute’n an hman sual thu tarlan a ni a. Thubuai thehluhah hian dik lo tak a sorkarin “designated burial sites” a awm an tih thu tarlan a ni a. Nimahsela, RTI kaltlanga zawhna chhannaah chuan, chutiang ang hmun a awm loh thu sawi a ni thung. Tin, khawtlang mite hnen atanga dodalna a awm loh pawhin, police-te chuan buaina siama an inrawlh thin thu leh pastor thenkhatte chu mitthi vuina an neih avangin man an nih thin thu tarlan a ni bawk.Thubuai thehluttute chuan he dilnaah hian anmahni khuaa inthliarhranna awm lova an inphum theihnan dilna an thehlut a. Tin, daidanna nena inphumna bik tur siam tawh lova, intluktlanna leh sakhaw zalenna chawinun nan, inthliarhrang lova mi zawng zawng inphumna tur hmun khata siam turin an ngen bawk. Court chuan sorkar hnenah hriattirna a pe a, he thubuai hi ni 23, March 2026 vela ngaihtuah chhunzawm leh beisei a ni(www.jclalnunsanga.in).

Supreme Court Chuan Disability Pension Chu Meizuk Avanga Natna Thlengah Pek A Nih Dawn Loh Thu A Sawi

18/02/2026
Admin

Supreme Court Chuan Disability Pension Chu Meizuk Avanga Natna Thlengah Pek A Nih Dawn Loh Thu A SawiNi 12, February 2026 (Ningani) khan Supreme Court chuan Army-te natna chu anmahni meizuk avanga thleng a nih chuan disability pension an dawn theih loh thu a sawi. He thubuai hi Armed Forces Tribunal te’n army pakhat hnena disability pension an pek duh loh avanga Supreme Court-a an appeal-na a ni a. Medical Review Board chuan he thubuaia sipaiin stroke a neih nachhan hi ni khata bidi(/biri) 10 chuang a zuk thin vang niin an sawi a, sipai hna a thawhna nen inzawmna a awm loh thu an sawi a ni. Justice Aravind Kumar leh Justice P.B. Varale-te bench chuan Medical Report leh Medical Board te chuan a natna “Stroke Ischemic RT MCA Territory” chu a hna thawh vang emaw a hna thawhna hmun atanga lo awm a nih loh thu an finfiah ve ve thu an tarlang a. Regulation 173, Pension Regulations for the Army, 1961, leh Guide to Medical Officers, 2002, in a sawi angin zangnadawmna chu zu, tobacco, drugs leh anmahni inven theih thil avanga natna(disability) atanga lo awmah te chuan pek theih a nih loh thu tarlan a ni a. Regulation 173, Pension Regulations for the Army, 1961, leh Guide to Medical Officers, 2002 in kaihhruaina a pekah te hian Court chu a innghat a ni.Court chuan ischemic stroke siam theitu hrang hrang te chu meizuk, BP sang, diabetes leh cholesterol sang a nih chu an tarlang a. Court chuan Armed Forces Tribunal thutlukna chu a fel lohna a hmu a lova, Tribunal thutlukna chu a pawmpui ta a ni(www.jclalnunsanga.in)(He thubuai Sarevesh Kumar vs. Union of India & Ors. ah hian thubuai thehluttu tan Kaushal Yadav AOR, Adv. Nandlal Kumar Mishra leh ukil dangte an ding a, a leh lam tan ASG Satya Darshi Sajay, Adv. Shubh Sharma leh ukil dangte an ding)

Contract Hna Tam Tak Arunachal Pradesh CM Chhungte Hnena Pek A Nih Chungchang CBI Chhuichianna Neih Tir Turin Supreme Court Hnenah Thlen A Ni

18/02/2026
Admin

Contract Hna Tam Tak Arunachal Pradesh CM Chhungte Hnena Pek A Nih Chungchang CBI Chhuichianna Neih Tir Turin Supreme Court Hnenah Thlen A NiNi 17, February 2026 (Thawhlehni) khan Arunachal Pradesh Chief Minister, Prema Khandu chhungte hnena sorkar contract hna tam tak pek a nih chungchanga CBI chhui tura ngennaah, Supreme Court chuan thutlukna chu nakina siam turin a dah. Vikram Nath, Justice Sandeep Mehta leh Justice N. V. Anjaria te thutna bench chuan he thubuai hi an ngaithla a. He thubuai ngaihtuahna hearing neih a nih zawh hian, Court chuan a thutlukna chu nakina siam turin a dah a, kar hnih chhungin party pahnih te chu ziaka hnialna thehlut turin a ti bawk.He thubuai hi NGO pahnih: Save Mon Region Federation leh Voluntary Arunachal Sena te thehluh a ni a. Thubuai thehluttu tana ding, Senior Advocate, Prashant Bhushan chuan Arunachal Pradesh sorkarin affidavit a thehluh tawh chungchang chu a tarlang a. Senior Advocate, Prashant Bhushan chuan public works contract tam tak chu Chief Minister chhungte company hnena pek a nih thu a sawi a. Heng contract-te hi firm pali hnenah hlan a nih thu leh an pek zat zawng zawng hi kum 10 chhungin Rs.1270 crore chuang a nih thu a tarlang. He thubuai hi eirukna nen a inzawm avangin CBI chu chhuichianna neih tir a ngaih thu a tarlang bawk. Tin, state chhunga police-te chuan chhuichianna dik leh tha an neih theih a rinawm loh thu a sawi bawk.Ni 2, December 2025 khan Supreme Court chuan Arunachal Pradesh sorkar chu affidavit thehlut turin a lo ti tawh bawk. Chutah chuan kum 2015-2025 inkara contract inpek dan zawng zawng leh Chief Minister chhungte hnena pek te chu kimchang taka tarlang turin a hriattir bawk. Ziaka thu thehluh hi ngun taka ngaihtuah a nih hnuah Court chuan thutlukna a siam tur thu a sawi(www.jclalnunsanga.in)

Supreme Court chuan Anjel Chakma Tualthahna Chungchanga PIL Thehluhah Attorney General chu Hnam Inthliarhranna Dona Kawnga Kaihhruaina A Dilna Thubuai Chu Enfiah Turin a Ti

18/02/2026
Admin

Supreme Court chuan vawiin February ni 18,2026 khan North-east mi te laka hnam inthliarna leh tharum thawhna tihtawp dan tur kaihhruaina (guidelines) siamna Public Interest Litigation chu a ngaihtuah a. Court chuan India Attorney General hnenah thubuai siamte chu zir chiang turin a ti.He thubuai hi nikum December thlaa Uttarakhand-a Tripura thalai Anjel Chakma chi inthliarna avanga thah nia sawi a nih hnuah thehluh a ni a. He thubuai pu luttu, Advocate Anoop Prakash Awasth chuan mimala inlanin, North-east mite laka inthliar hranna leh pawl hrang hranga tharum thawhna thlengte a tarlang.Chief Justice of India Surya Kant, Justice Joymala Bagchi leh Justice Vipul Pancholi te thutna hmaah he thubuai hi ngaihtuah a ni a. Thubuai thehluttu chuan inthliarhranna chungchanga lungawi lohna awmte buaipui turin nodal agency chu State a dah an phut thu an sawi a. Amaherawhchu, CJI Kant chuan hetiang kaldan chuan “regional identity” hmanga inthen darh belhna a fuih thei tih a sawi a, thubuai thehluttute chu thuneitute hnenah lehkha(representation) thehlut turin a ti a ni.Thubuai thehluttute chuan tuna Criminal Law hman laiah hian hetiang ang thubuai ngaihtuah tur nodal agency emaw special provision a awm lo tih an sawi a. Lungawi lohna put luh theihna tur eng emaw tal siam a ngai tiin, a bik takin zirna in-ah te awm a ngaih thu an sawi bawk.Court chuan PIL hian hnam, pianna hmun emaw, tawng emaw avanga pawl hrang hranga tharum thawhna leh inthliarna venna atana dan kalphung nghet tak siam a tul tih an hmu a. Thubuai thehluttuin Uttarakhand-a Anjel Chakma inthahna rapthlak tak thubuai chingfel tura a ngenna chu a tarlang bawk.Supreme court chuan he thubuai hi tun dinhmunah chuan Attorney General kaltlangin thuneitute hmaaah dah ni se tiin a rel a, thubuai hi a ti tawp nghal a ni (www.jclalnunsanga.in).(He thubuai hi Anoop Prakash Awasthi Vs Union of India, WP(Crl) No.2 of 2026 a ni)

DISCLAIMER