Supreme Court

Supreme Court Chuan High Court-te Hnenah Thutlukna Siam Tura Khek Tikhawtlai Lo Turin Kaihhruaina A Tichhuak; Thla 3 Chhungin Thutlukna Siam Zel Turin Hun Bituk A Siam

29/05/2026
Admin

Supreme Court chuan thutlukna siam tura reserved a nih hnua thutlukna puan chhuah tlai thin anih chungchangah High Court zawng zawngte zawm tur guidelines a chhuah a. Justice Surya Kant leh Justice Joymalya Bagchi-te bench chuan High Court-te chu thutlukna reserved a nih atanga thla thum chhunga thutlukna puang hman turin an hriattir a ni. Bail chungchangah phei chuan, tualchhung court-te chu a theih hram chuan thutlukna siam ni la laa puang leh upload turin an hriattir a, thutlukna khek a nih pawhin a tuk aia tlai lova ti fel turin thupek an chhuah a ni. Court chuan mimal zalenna kaihhnawih thubuaite chu hmanhmawhthlak bika ngaih tur a ni tih a sawi bawk.Court chuan thla thum chhunga thutlukna puan a nih loh chuan, Registrar General-in High Court Chief Justice hnenah a hriattir tur a ni a. Tichuan Chief Justice chuan thubuai chu bench dangah a sawn thei ang. Thubuaia tel ve party-te pawh hian thutlukna puang hma turin emaw, a tlai deuh chuan thubuai chu bench danga sawn turin an dil thei bawk ang. Thutlukna a tawi taka puan chhuah a nih pawhin, a chipchiara chhan leh vang hrilhfiahna awmna thutlukna chu ni sawmpanga chhungin upload ngei ngei tur a ni.He thubuai hi Jharkhand High Court-a tang mek mi pali (4)-in thubuai chu inhnialna leh an tanhmun sawifiahna an nei zawh vek tawh hnu pawha kum tam tak tihkhawtlai a nih tak atanga chhuak a ni. Supreme Court chuan hetiang reia tihkhawtlaina hi India Dan Pui (Constitution) Article 21-naa right to life and personal liberty kalh a ni tih a sawi a. (www.jclalnunsanga.in)(He thubuai hi Pila Pahan@Peela Pahan and Ors. v. State of Jharkhand and Anr.W.P.(Crl.) No. 169/2025 a ni. Thubuai thehluttu tan hian AOR Vanya Gupta, AOR Fauzia Shakil leh ukil dangte an ding a; a leh lam tan AOR Pallavi Langar, AOR Ambhoj Kumar Sinha leh ukil dangte an ding)

Coimbatore Classroom Tê Tak Tê Aṭanga Supreme Court Thlengin: V. Mohana-i Nun Kawng Ropui Leh Entawntlak

29/05/2026
Admin

Supreme Court Collegium chuan May 22 leh 27, 2026 khan Senior Advocate V. Mohana chu Supreme Court Judge ni turin rawtna sawrkarah a thlen. Pi V Mohana hi an chhungkaw zinga ukil hmasa ber niin, kum 1983-a India rama kum nga chhung zir tur integrated law course siam hmasak ber ṭumah khan a zir a, tunah chuan Supreme Court-a hmeichhe tlemte 'Senior Advocate' nihna dawng thei zing ami a ni. He dinhmuna a din theihna chhan hi kum tam tak chhung rim taka a thawhna leh a inpekna vang tak meuh meuh a ni.A Bul Tan Chhoh DanV. Mohana hian kum 1988 khan Coimbatore Law College (tunah chuan Government Law College, Coimbatore) aṭangin a zir chhuak a, hemi hun lai hian college building hi luah hawh chawp a nih avangin hmanrua leh hmunhma a chep hle. Higher secondary a zawh hnu phei chuan India rama a vawikhatna atana kum nga chhung zir tur integrated law programme duan hmasak berah khan a tel zui a ni. Hmun hma a ṭhat tawk loh pawh sawi loin, hmeichhe zirlai an tlem hle chung pawhin lehkha zirna lamah te, debate lamah te, lemchan leh vantlang hmaa thu sawina lamah te ti tha thei hle thin. A zirna kawng hian ama in tum chawp nan mi tuition a pe thin a. Hmeichhe hna thawk hostel hun khauh tak hnuaiah a khawsa ve thin a ni.Mohana hian Coimbatore-a civil lawyer hmingthang M. Panchapakesan-a hnuaiah ukil hna kalphung tam tak a zir a ni.Khang tawn hriat te khan a hna thawhna kawngah thiamna hlu tak a siam a. A zir zawh hnu pawhin Panchapakesan-a hnuaiah mipa zingah nikhatah darkar 12 thawk chungin court hmaah huaisen takin a inlan chho ṭan ta a ni.Kum 1992 khan, Coimbatore-ah ama puala case a khawih ṭan ve chauh laiin, Mohana chuan New Delhi lama pem turin thutlukna huaisen tak a siam a. Supreme Court judge ni ta Indu Malhotra, hemi hun laia Advocate-on-Record ni bawk hnuaiah a thawk a. Special Leave Petitions draft hna te, writ petitions te, leh constitutional thubuai lian thamah senior counsel te puihna hna a thawk chho ta a ni.AOR Exam Paltlang Leh Ama Puala Hna Thawh TanKum 1996 khan fa pawm chungin Advocate-on-Record exam harsa leh inelna sang tak chu a paltlang a, Mohana chuan Supreme Court, Delhi High Court, National Consumer Disputes Redressal Commission, leh tribunal hrang hrangah ama pualin a thawk chho ta a ni. India sorkar tan thubuai hrang hrang a khawih a, ram danpui thubuai, eirukna, ruihlo, criminal law, service law, leh mimal inrem lohna (civil disputes) te a khawih thin a ni. Ukil hna pangngai piah lamah, inremna siam (mediation), legal aid, leh pro bono te pawh a thawk thin a. Civil leh criminal thubuai hrang hrangah amicus curiae angin a inlan fo bawk a, Supreme Court Legal Services Committee-ah pawh thawh hlawk tak a ni.Tin, kum 2015 khan Senior Advocate nihna pek a ni ta bawk.Supreme Court Judge Tana RawtnaCollegium chuan Supreme Court Judge ni turin a tlen ta a.Classroom te tak te Coimbatore aṭanga ram chhunga court sang ber a thleng chho thei hi ama mimal hlawhtlinna mai a ni lo a, ukil thar te, a bik takin hmeichhia he hna zawm leh tur te tan beiseina leh phurna thar petu leh entawntlak tak a lo ni ta zel a ni. Central Government-in he rawtna hi a pawm hunah chuan Supreme Court-ah hmeichhe representation a titha zual sauh dawn a ni. (www.jclalnunsanga.in)

Supreme Court Chuan Special Intensive Voter Revision Kalpui Tur A Election Commission of India Thuneihna A Pawmpui

28/05/2026
Admin

Supreme Court chuan Constitution leh Representation of the People Act, 1950 hnuaia Election Commission of India (ECI)-in Special Intensive Revision (SIR) kalpui tura a thuneihna chu pawm puiin, Electoral Rolls (voter list) enfiah hna, Special Intensive Revision (SIR) an kalpui thin chu a thlawp a. Court chuan ECI hian voter list-a mi pakhat hming a awm zui zel dawn leh dawn loh endik nan thuneihna an neih thu a sawi a. Chief Justice Surya Kant, Justice Joymalya Bagchi leh Justice Vipul M Pancholi te bench chuan inthlan zalentak leh dik tak neihna atan voter list dik leh rintlak a pawimawh hmasa ber tih an sawi a. Court chuan SIR kalpui lai hian tuma hming paih dik lo taka paih mai a nih loh nan chhanna pe tura tih te te, hearing neih te, objections siam te, appeals leh judicial review te thlengin invenna tur tha tawk tak siam a ni bawk tih a sawi.Court chuan SIR hi India danpui kalh leh duh duh dana tih a ni tia sawiselna te chu a hnawl a. Election Commission hna thawh chu a dik a, a rualkhai a, election dikna vawnhimna a nih thu Court chuan a sawi. Tin, court chuan voter list-a hming lang tawh te chu khua leh tui niah ngaih nghal theih ni mah se, special revision neih chhung hian enfiah leh theih a ni tih a sawi a. ECI hian mi pakhat khua leh tui nihnaa rinhlelh vanga a hming a paih a nih chuan, chumi chungchanga thutlukna siam turin kar li chhungin Citizenship Act hnuaia thuneitu tling hnenah a thlen tur a ni a. Thuneitu hian thutlukna a siam hmain a insawifiahna hun leh a thu ngaihthlakna hun an nei hmasa ngei tur a ni a, khua leh tui an ni ngei tih finfiah a nih chuan an hming chu voter list-ah thun let leh ngei tur a ni a ti bawk. He thubuai hi Association for Democratic Reforms leh hruaitu dang Yogendra Yadav, Mahua Moitra te leh pawl hrang hrangin Bihar-a SIR kalpui dan an sawiselna atanga lo piang chhuak a ni(www.jclalnunsanga.in)(He thubuai hi Association for Democratic Reforms & Ors v. Election Commission of India & other connected matters, WP(C)640/2025 a ni)

Supreme Court Bar Association Chuan Senior Advocate Khaja Moizuddin Tualthihna Chu Na Takin An Dem A, Chhuichianna Dik Tak An Phut

28/05/2026
Admin

Supreme Court Bar Association (SCBA) chuan Hyderabad-a ukil senior Khaja Moizuddin thhah a ni chu nasa takin a dem a, "ruahman lawk sa, nunrawnna leh tualthahna runthlak tak" a ni tiin a sawi. Association Honorary Secretary Pragya Baghel-a thuchhuaha tarlan danin, he thil thleng hian ukil-te a tibuai hle a, ukil-ten an hna an thawhnaa an himna chungchangah ngaihtuahna thuk tak a hring a ni, a ti a. SCBA chuan ukil-te chunga tharum thawhna hi mi mal chunga pawikhawihna a ni lo va, rorelna dik leh dan lalna beihna a ni zawk tih a sawi.Khaja Moizuddin hi Telangana High Court leh City Civil Court-ah te kum 30 aia rei ukil hna lo thawk tawh a. May 23 khan Masab Tank-a a chenna in kawtah beih nia hriat a ni. CCTV footage-ah chuan Scorpio SUV hring pakhat hian a lirthei pakhata a luh dawn lai takin a su nia hmuh a ni a. Hliam na tak tuarin, a hnuah damdawi in pakhatah a boral ta a ni. SCBA chuan a chhungte hnenah thlamuanna thu a thawn a, he thila mawhphurtute hi rorêlna dik hma chhawn tura hruai thlen thuai an nih theih nan thuneituten fel tak, rang tak leh kimchang taka chhui zui turin a ngen a ni(www.jclalnunsanga.in)

Supreme Court Chuan Right to Trauma Care hi Right to Life Huangchhung Ami A Ni A Ti

28/05/2026
Admin

Supreme Court chuan trauma leh emergency atanga inenkawlna dawn theihna hi India Dan Pui Article 21 hnuaia nung dama awm theihna dikna chanvo (Right to Life) peng khat a ni tih a sawi.Court chuan mi tam tak, kawnglaia chetsualna thleng hmutu ten mangang taka va puih an hreh chhan chu, police-in thil an zawtfiah ang tih an hlauh vang te, dan anga buaina tawh an hlauh vang te, hmuh hrehawm an tih vang leh rilrua a cham reng an hlauh vang te a ni tih an hmu a. Hetiang hi “reactive paralysis” tiin a sawi a, India ram pumah hetiang hliam tuarte enkawlna (trauma care system) rintlak leh rualkhai tak siam a tul zia a sawi uar hle a ni.Justice JK Maheshwari leh Justice Atul S Chandurkar-te bench chuan, chetsualna a thlen hnu darkar khat chhung “golden hour” an tih mai hi nunna chhanhim nana hun pawimawh ber a nih thu leh, hemi chhunga hmanhmawh taka damdawi lama tanpuina pek hian nunna tam tak a chhanhim thei tih an sawi a. Hemi chungchang hi Savelife Foundation ten India ram chhunga rang taka chhanhimna pek zung zung a nih theihna tur te, ambulance service te, leh thahnemngai taka lo puihbawm tute (Good Samaritan) venhimna dan tha zawk siam tura Court an ngenna atanga lo piang a ni.Court chuan State leh Union Territory zawng zawngte tan thupek lailawk pawimawh tak tak a chhuah a. Thla thum chhungin emergency helpline number awm zawng zawngte chu ram pumah helpline pakhat "112"-ah fin khawm vek turin a hrilh a, chutih rualin Good Samaritan-te venhimna atan a hmunah leh online-a complain theihna siam turin a hrilh bawk.Hemi bakah hian Court chuan ambulance zawng zawngah GPS tracking hmang turin leh, paramedic training-te inrualkhai taka siam a nih thu te, leh trauma case-te uluk zawka thlithlai a nih theih nan State Trauma Registry-hliam tuarte chhinchhiahna te siam turin a hrilh a ni. Sorkar chu damdawi in hrang hrang a an trauma care hmanrua neih dan azira grade thliar hrang tur leh, emergency service leh Good Samaritan-te dikna chungchanga awareness neihpui turin a hrilh bawk. Court chuan India ram pumah hliam na thut enkawlna rintlak leh rualkhai tak an din theih nan Union leh State sorkarte chu an thawhho a tul a ni tih a sawi lang bawk(www.jclalnunsanga.in)(He thubuai hi Savelife Foundation & Ors vs. Union of India & Ors niin, thubuai thehluttu tan hian AOR Malvila Kapila leh ukil dangte an ding a; a leh lam tan AOR Madhulika Upadhyay, AOR Guntur Pramod Kumar, AOR Disha Singh leh ukil dangte an ding)

NEET-UG 2006 Question Paper Put Ru Chungchangah NTA Chu Supreme Court-in Channa Pe Turin A Hriattir

26/05/2026
Admin

Ni 25, May 2026 (Thawhtanni) khan Supreme Court chuan National Testing Agency (NTA) hnenah NEET-UG 2026 question paper put ru nia sawi chungchanga ngenna hrang hrang lutah chhanna pe turin a ti a. Justice PS Narasimha leh Justice Alok Aradhe-te Bench chuan kum 2024-a thil thleng leh a hnua siamthatna nei tura rawtna a awm tawh chung pawhin zirchhuah engmah an nei lo chu pawi an tih thu an sawi.Supreme Court chuan NTA chu kum 2024-a hetiang thil thlen hnua monitoring committee din tak chetvelna leh dinhmun hrilhfiahna affidavit thehlut turin a hriattir a, hemi atana committee chairman K Radhakrishnan chu invenna tura Court in rawtna siam taka an hmalakna te chipchiar taka thehlut turin a hrilh bawk. Hemi chungchang hi May 29-ah ngaihtuah leh a ni anga, chumi hma chuan NEET-UG 2026 re-examination chu June 21-a neih tura ruahman angin a la kal thung ang.Federation of All India Medical Association leh United Doctors Front te leh pawl hrang hrangte ngennaah hian Computer-Based Test (CBT) system-a inthlak te, question paper-te digital locking neih te, biometric kalpuina te, AI hmanga thil rinhlelhawm vilna te, leh NTA chu Statutory Body puitlinga thlak hialte an phut a ni. Thubuai thehluttute chuan paper leak nia sawi fo hian exam hmachhawn tum mi nuai 22 chuangte Constitution-a Article 14 leh 21-na hnuaia an dikna chanvote a palzut sak tih an sawi a. Exam nawnna lo awm tur pawh hi CBT mode hmanga, dan leh khawl tha tak hmanga vilna nei turin an phut bawk a ni(www.jclalnunsanga.in)

DISCLAIMER